SUSIHON sa kapolisan sa siyudad kon malakip ba nila og silot ang mga ginikanan sa mga menor de edad nga kanunay nga ma-rescue atol sa curfew.
Ang kapolisan sa siyudad nibutyag nga ang ilang mga madakpan nag-edad og 10 ngadto sa 16-anyos.
Matud sa Tagbilaran City Police Office (TCPO) nga ang mga kabataan ilang gi-turnover sa matag barangay ug ang barangay na ang mopatawag sa ginikanan aron mapaubos sa seminar kong unsaon nila paghipos sa ilang mga anak panahon sa kagabhion.
Nagtuo ang TCPO nga ang community service alang sa mga ginikanan mao ang sakto nga silot.
Samtang ilaha usab nga nahatagan og warning ang internet café o nagdumala og mga computer-ran kinsa padayon nga magpasulod og menor de edad sa lapas sa alas 10:00 sa gabii.
Lakip na usab unya ang mga restobar nga mopasulod usab og menor de edad. Ug kong ang mga establishemento padayon sa kalapasan ilaha ipasusi ang permit ug himuon kong unsa man ang angayan aron sila magmatngon sa pagpatuman sa curfew. (RTB)
