Ni Wilson Auguis Subrio
GIDALA sa Kagamhanang Probinsyal sa Bohol pinaagi ni Gobernador Aris Aumentado ang mga ayudang-pinansyal alang sa lima (5) ka mga lungsod nga mao ang mosunod: Loon, Antequera, Balilihan, Catigbian ug Dagohoy.
Gitunol ni Gobernador Aris Aumentado ang P130,000.00 sa duha ka barangay sa Loon nga mao ang Barangay Tubodacu ug Barangay Catagbacan Norte ug personal nga nakighinabi sa mga katawhan sa barangay, ilabina ang mga opisyales.
P100,000.00 ang nadawat sa Brgy. Tubodacu nga financial assistance alang sa ilang proyekto nga Farm to Market Road. Ang pundo niini gikan sa buhatan ni BM Benjie Arcamo.
Sa iyang pagderetso sa Brgy. Catagbacan Norte, gihatud ang financial assistance nga P30,000 alang sa ilang pagpalit og heavy duty nga grass cutter. Ang pundo niini gikan ni BM Aldner Damalerio.
Giduaw ug gikahinabi ni Gob. Aris ang si Kapitan Leonarda Dabalos sa Brgy. Bitaugan, Antequera ug gitunol ang P80,000.00 alang sa ilang ika-78 nga Foundation Day.
Kining maong pundo napagawas gikan sa Kagamhanang Probinsyal pinaagi sa mga buhatan nila ni Vice Gov. Dionisio Victor Balite (P40K), mga Board Members Aldner Damalerio (P15K), Lucille Lagunay (P15K) ug Benjie Arcamo (P10K).
Gihatdan usab ni Gob. Aris ang Brgy. Cogon sa Balilihan og P70,000.00.
“Nakahinabi nato ang atong mga kahigalaan sa barangay Cogon, Balilihan ug nangumusta kita kanila, hilabi na ang mga opisyales,” matud ni Aris.
Ang maong kantidad alang sa ilang ika-11th Foundation Day.
Ang pundo niini gikan sa buhatan nila ni VG Dionisio Balite (P30K), BM Arcamo (P15K), BM Damalerio (15K), ug BM Lagunay (P10K).
Ang Brgy. Kang-Iras, Catigbian nakadawat og P40,000.00 alang sa selebrasyon sa Foundation Day.
Ang maong pundo gikan sa mga buhatan nila ni Bokal Benjie Arcamo, Aldner Damalerio, ug Lucille Lagunay.
Ug P39,994.50 gihatud sa Brgy. Malitbog, Dagohoy.
Gamiton kini alang sa rehabilitasyon sa Purok 7 Center, ug gikan kini sa paningkamot ni kanhi Bokal Restituto Auxtero ug sa mga buhatan nila ni Bokal Vierna Mae Maglasang ug Romulo Cepedoza (ABC).
Sa ngalan ni Gob. Aris, si Executive Assistant Jun Flores maoy personal nga nibisita sa maong barangay.
Nipahinumdom usab ang gobernador nga i-liquidate dayon ang nadawat nga mga tseke aron makadawat gihapon sa ubang mga tabang gikan sa Kagamhanang Probinsyal, ilabina ang P200,000 alang sa mga priority projects.
