DIAY laing pait, apan maoy kamatuoran. Ang pagkaon og karne maoy ikatulong nag-unang hinungdan sa global warming. Kon gusto mong magtuki og ngano o giunsa, i-Google lang.
***
Sa iyang presentation ngadto sa worldwide stakeholders ug mga intellectuals nga nag-ulohan, The Third Industrial Revolution, si Jeremy Rifkin, consultant sa China ug sa European Union, miingon nga halos tanang aktibidades ug kalihukan sa tawo sa sunod nga mga dekada anha na pagahimuon sa Internet. Siya mihatag sa seryosong warning: ang gubat anha na sab sa Internet. Usa kini ka gubat tali sa mga pwersa sa kahayag ug kangitngit. Ang duha ka managtigi nga pwersa gitawag og DarkNet ug LightNet. Kini nagsugod na karong panahona. Mao nga kinahanglan kitang mag-amping kay aron dili kita magamit sa DarkNet. Dili kini usa ka duwa. Tinuod kini. Og gitagna na kini diha sa Bibliya sa Efeso 6:12.
***
THREE-IN-ONE NGA KAPE, FOUR-IN-ONE NGA TAWO UG ANG DILI MAKITANG IKAW. Karon familiar na kita sa three-in-one coffee sa mga sachet nga kalain-laig brand ug flavor. Duna gani nangangkon nga walo kuno ang ingredients sa ilang kape, busa eight-in-one kini. Wa gyud ta masayud kon unsay gihimo anang mga kapeha, pero sige gihapon tag laklak.
Ang mas importante mao kini. Matud pa sa akong favorite philosopher-scientist nga si Rudolf Steiner, ang matag tawo kuno upat ka pilo, sa ato pa, four-in-one. Ang tinuod nga ikaw nga imong tawgog “Ako” nga ianak, makasinatig pag-antus ug kalipay; unya, mamatay ug ianak pag-usab hangtud nga mahimong perfecto. Kining “Ako” matud ni Steiner, migamit sa tulo ka lawas. Apan usa lamang sa tulo ang makita, og kini mao ang pisikal nga lawas nga gamiton sa “Ako” aron molihuk o moaksyon. Ang ikaduhang lawas, nga dili makita, mao ang lawas sa pagbati; alang kini sa pagbati. Sunod mao ang lain pang dili makitang lawas nga gamiton alang sa paghunahuna.
Unsaon nato pagkahibalo kon tinuod ba kini? Obserbahi ang patayng lawas sa tawo. Bisita sa bisan diing funeraria kon wa pa ka kitag patayng lawas sa tawo. Mobati ba kini? Dili. Mohunahuna ba kini? Dili sab. Og kana tungod kay ang tinuod nga ikaw, o “Ako”, ang nagpuyo sa pisikal nga lawas, uban sa lain pang duha ka lawas nga dili makita, mibiya na man sa pisikal nga lawas. Og tuod diay, ang tinuod nga ikaw, nga imong gitawag og “Ako”, dili usab makita. Entonces, ikaw (o bisan kinsang tawo) usa ka invisible man, o invisible woman; sa ato pa, dili makitang nilalang.
Kon gusto kang masayud og dugang bahin niini, tan-awa sa Internet ang https://www.anthromedics.org/BAS-0347-EN, sa ulohan nga, “The Fourfold Human Constitution”.
Ang atong panultihon karong semanaha gikan kang Norman Schwarzkopf: “Sa pagkatinuod nasayud gyud ka sa husto ug angayang buhaton. Ang pagbuhat maoy lisud”.
