NIKABAT na sa kapin P72,000,000 nga kantidad sa shabu ang nahipos sa kapulisan sa Bohol sa nagpadayon nga kampanya batok sa illegal nga drugas.
Ang Bohol Police Provincial Office (BPPO) nipresentar sa maong datos atol sa Provincial Peace and Order Council (PPOC) Meeting, Agosto 3, 2023, sa pagpanguna ni Gobernador Aris Aumentado sa Ceremonial Hall sa Kapitolyo.
Sigun sa datos, gikan sa Enero 2023 hangtud Hulyo 2023 ni-abot og P72,385,542 ang kantidad sa shabu nga nasakmit sa nagkadaiyang anti-illegal drugs operation.
Ang maong kantidad nitimbang og 10,644.93 ka gramos samtang ang kantidad usab sa Marijuana nga nasakmit, nikabat sa 2,400 ug adunay timbang nga 20 gramos.
Nakasakmit usab ang 6 ka armas atol sa nahisgutang mga operasyon.
Samtang ang mga suspek nga nasikop ana-a sa 417 ka indibidwal gikan sa 371 ka mga operasyon.
Ang tanang paningkamot maoy prayoridad sa kasamtangang administrasyon sa pakigbatok kontra sa ilegal nga drugas diin kahinumduman nga nagpagawas og duha ka mahinungdanong Executive Orders (EOs) ang Gobernador aron sa pagpadayon sa pakigbatok sa illegal nga mga substansiya, sama sa EO No. 4 nga nag-tukod og kaugalingong K-9 Units sa Bohol ug EO No. 31 nga nagmando sa K-9 units sa pagpahigayon og hingpit nga pagsusi sa tanang mga sakyanang de motor nga mosulod sa Bohol nga moagi sa mga pantalan.
Subay sa Strategic Change Agenda sa administrasyon, kini nga mga lakang gihingusgan sa pagpatunhay sa kalinaw ug kahapsay sa Bohol, ang kaluwasan ug seguridad alang sa negosyo, turismo, ug alang sa kaayuhan sa tanang Bol-anon, ilabina karon nga ang probinsya usa na ka UNESCO Global Geopark Regenerative Island Province diin nag-inusara sa tibuok kalibutan. (Wilson Auguis Subrio with reports PIMO)
