ANG lalawigan sa Bohol ug Siquijor mao na lang ang duha ka probinsya sa Central Visayas nga libre pa sa gikahadlukang African Swine Fever (ASF), virus nga mopatay sa binuhing baboy.
Kini ang gibutyag ni Office of the Provincial Veterinarian (OPV) officer Dr. Stella Marie Lapiz sa usa ka meeting tali sa LGU-Pilar sa nakalabay nga adlaw human nagpositibo sa “viral disease” ang pipila ka mga baboy sa Purok 6, San Vicente sa maong lungsod.
Ang probinsya sa Bohol upat (4) na ka tuig nga nagmalampuson sa pagbabag nga makasulod ang ASF dinhi, suma ni Dr. Lapiz.
Atol sa programang The Capitol Reports, Agosto 4, nihatag og direktiba ug mando si Gob. Aris Aumentado ngadto ni Provincial Legal Officer Atty. Handel Lagunay nga ipang-kiha ang mga magpasulod og ilegal nga karneng baboy dinhi sa lalawigang Bol-anon.
Nigawas kining maong mando human gibutyag ni Dr. Lapiz nga daghan gihapon ang mosuway og palusot og mga karneng baboy pasulod dinhi.
Gani, usa ka Barangay Kapitan ang nasakpan nga nagpalusot og karne didto sa pantalan sa Tubigon gikan sa Cebu.
Sa iyang kabahin, si Atty. Lagunay misulti nga iyang sundon ang mando sa gobernador, suma sa taho ni Anthony Aniscal.
Sa pagkakaron, matud sa provincial ordinance, dunay fine/penalty nga P5,000 ang bisan kinsang magpalusot og illegal nga karneng baboy pasulod sa Bohol. Gawas sa P5,000 kumpiskahon ug sunugon usab ang mga ma-imbargo.
Matud ni Lagunay, tun-an nila ang ubang national laws aron maoy magamit pagkiha sa mga malapason. Iyang gisulti nga iyang subayon basin puwede nga ECONOMIC SABOTAGE ang ikaso sa mga malapason. Kining kasuha walay pyansa ug dako ang penalidad niini.
Ang industriya sa baboy dinhi sa Bohol nagkantidad karon og 6 bilyones ka pesos nga may 48,000 households nga namuhi.
Ang Bohol mipagawas og 10,000 na ka mga baboy padong sa Manila. Gipaningkamutan sa Kagamhanang Probinsyal sa Bohol nga protektahan ang industriya sa baboy nga usa sa nagpabuhi sa ekonomiya sa lalawigan sa mga pamilyang Bol-anon. 90% sa industriya sa baboy mao ang backyard samtang ana-a lang sa 10% ang commercial piggery sama sa Alturas ug BQ.
Nihangyo usab ang OPV nga magtinabangay ug i-report sa ilang buhatan kon anaay masakit o mamatay nga mga baboy.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
