MATAG administrasyon aduna gayuy mga factions tungod kay ania man kita sa sistemang demokrasya. Bisag managsama ang partido, mahimo gihapon nga managlahi ang baruganan nato.
Pananglitan, matud pa sa usa ka lumalaban ni Digong Duterte, maayo pa kuno unta og wa na lang siya manghambug nga ang problema sa droga sulod sa tulo ka bulan iyang sulbaron, kay hangtud karon ang droga naghitak man gihapon. Maayo pa kunog wa siya mopasalig nga ang Internet iyang pakusgon, kay hangtud kuno karon ang Internet dinhis ato sa Pilipinas nagkamang man gihapon.
Matud pa usab sa usa ka vocal kaayong lumalaban ni Bongbong Marcos pagkahuman niyag tan-aw sa SONA, misulti siya sa radyo og miingon: “Unsa man tong SONA ni Presidente Marcos, Jr. pulos man to sulti, wala man toy agi”? Kana nga mga yango-ngo gikan mismo sa ilang mga lumalaban.
Niadtong panahon usab ni Art Yap akong nadunggan ang usa ka hepe sa opisina diha sa Kapitolyo nga tig-lecture kon unsaon pagbantay aron kuno dili makawkaw ang panudlanan sa lalawigan. Miingon siya: “Maayo pa unta to kung wala i-bobo ni Gov Art Yap ang usa ka bilyon nga pondo sa usa lang ka departamento. Dili unta ma-suspenso si Larry Pamugas nga buotan natong amigo”.
Karong semanaha atong gikahibagat ang usa ka lig-on ug banggiitang mayor nga gisaligan ni Governor Aris Aumentado. Mihunghung siya naku sa pag-ingon: “Ajo untag wa na lang nang OGAR-ogar ba, aron wala na guy gukdon ug lutuson. Wa may perfecto nato ba. Wa may santo. Kanang ex-mayor diha nga sig panggukod, perfecto diay na sija? Santos diay na sija”?
Wa ko katingog kay wa ko magdahum nga isulti to sa usa ka lig-ong lumalaban ning kasamtangang administrasyon sa Abante Bol-anon. Pero lisud pud lalison ang iyang punto. Midugang dayon siya paghunghung: “Di lang ko makayawyaw ana sa publiko kay kauban man mig partido. Og kami ra puy mag-away-away, maut na kaayo. Ayaw bayag saba ni Gov, Sir ha”. Isip usa ka journalist ato gyung itamud ang katungod sa atong sources. Kon dili sila gustong magpaila, ato gyung respetoan ang ilang privacy.
Sa laing bahin, akong gikahinabi ang usa ka driver nga nagpahulay sa iyang gi-driveban nga sakyanan paghuman niyag pamainit og saging ug kape usa ka hapon niana. Naminaw siya sa usa ka tigpamaba sa grupong Padayon Bol-anon nga nagsigeg saway sa pamunoan ning atong probinsya karon. Ako siyang gipangutana: “Bay, tigpaminaw diay ka anang mga bomba sa politika? Layo pa man ang eleksyon, unya, binombahay na”?
Iyang tubag: “Aw, og akoy interbyuhon anang anawnsera, Sir, aho gyud siyang ingnon: Palangsara gud na si Art Yap og balik o kinsa man diha sa ilang pondok, aron naay klarong kontra si Aris. Kay kon way kontra si Aris, asa pud na mangtagad. Di mi kasaping mga pobre. Busa kon tinuod nga gusto motabang si Art Yap namong mga pobre, palangsarag otro, aron ang uwan-uwan sa Mayo, segurado”.
Paita.
