TAGBILARAN CITY, Bohol (PIA) — Wala na’y angay ikabalaka ug dili na maguol sa pangbayad alang sa mga medical procedure ang mga ‘less fortunate’ o kabus nga mga Filipino nga mopaubos sa dialysis.
Kini tungod kay ihatag na og libre sa gobyerno ang dialysis session.
“Upang mas lalo pang makatulong sa mga pasyente, ang dating siyam-napung libreng dialysis sessions ay inakyat na natin sa isandaan at limampu’t anim. Mga kababayan, libre na po ngayon ang dialysis para sa karamihan ng Pilipino,” matud pa ni Presidente Ferdinand R. Marcos Jr.
Gipahayag kini sa Pangulo sa iyang ikaduhang State of the Nation Address (SONA) sa Batasang Pambansa, sa lungsod sa Quezon.
Gitumbok sa Pangulo ang 3.4 milyong Filipino nga nakadawat og health assistance ubos sa Medical Assistance for Indigent Patients (MAP) program sa Department of Health (DOH).
Gipasalig usab ni Marcos nga gi-trabaho na usab sa gobyerno ang pagsulbad sa kakulang sa mga doctor ug nurse sa nasud.
“Tinutugunan natin ngayon ang ating kakulangan sa mga doctor at mga nurse, sa pamamagitan ng mga reporma sa edukasyon, patuloy na pagsasanay, at paniniguro sa kanilang kapakanan,” pahayag pa sa Pangulo.
Gidugang pa niini nga nag-deploy na ang gobyerno og mga doctor sa halos 200 ka munisipalidad sa nasud ug misaad nga mag-deploy pa sa nahabiling 19 ka lungsod.
“Upang masuklian naman ang naging sakripisyo ng ating mga health workers sa pribado at pampubliko na mga ospital noong nakaraang pandemya, ipapamahagi na sa kanila ang kanilang COVID health emergency allowance at iba pang mga nabinbing benepisyo,” matud pa ni Marcos. (ECB/PIA7-Bohol)
BALITE NIHANGOP
Gihangop ni Bise-Gobernador Dionisio Victor A. Balite, Ph.D ang mga giluwatan nga pamahayag ni Presidente Ferdinand “Bongbong” Marcos, Jr. sa iyang ikaduhang State of the Nation Address (SONA) karong bag-o lang.
Nipadayag ang bise-gobernador nga gibati niya ang dakong kalipay sa pamahayag sa presidente nga ipatuman ang free dialysis.
Matud ni Balite nga dili ikalimod nga usa sa iyang mga adbokasiya ang mahatagan og pagtagad ang mga Bol-anong dialysis patients.
Nagkanayon pa si Balite nga iyang gikalipay ang maong pamahayag sa presidente sa iyang SONA tungod kay bag-o lang gibuksan ang dialysis center sa kagamhanan sa lalawigan.
Gidayeg usab ni Balite ang presidente sa dugang pa nga giluwatan niining pamahayag sa iyang SONA tinguha niini nga paghatag og libreng edukasyon sa mga talented nga tinun-an apan walay pinansiyal nga ikagasto ang mga ginikanan ilabi na ang paghatag og kasulbaran sa kakuwang og mga classrooms ug mga pasilidad, ang paghatag og disyenteng kapuy-an sa mga kabus ug uban pa. (RTB)
