MIGAWAS ang lalawigan sa Bohol nga ikapito isip “most preferred” nga destinasyon sa mga turista sa nasud, sigon sa usa ka survey nga gipagawas karong bag-o sa Publicus Asia.
Subay sa resulta sa Publicus 2023 Second Quarter survey release, upat ka porsyento sa mga respondents ang nagpakita sa ilang tinguha nga mobisita sa probinsiya.
Ang resulta sa surbey nagpakita nga ang Bohol nakakuha sa pinakataas nga preferential rating gikan sa mga taga Visayas sa pito ka porsyento.
Nakuha niini ang tulo ka porsyento gikan sa mga residente sa National Capital Region, upat ka porsyento gikan sa mga respondents sa North Central Luzon, tulo ka porsyento gikan sa mga respondents sa South Luzon ug lima ka porsyento gikan sa mga respondents sa Mindanao.
Ang survey nga gihimo gikan sa Hunyo 7 hangtod 12 nga nag-una ang Palawan nga nakakuha ug 23 porsyento.
Sa usa ka pamahayag, ang PUBLiCUS miingon nga ang mga resulta naglatid sa lain-laing mga gusto ug interes sa mga Filipino kon bahin sa mga destinasyon sa pagbiyahe.
“Ang makabibihag nga katahum sa Palawan, ang kaanyag sa Baguio City, ug ang kultural nga mga kasinatian nga gitanyag sa Cebu, Siargao, Aklan, Batanes, Bohol, ug Davao tanan nakatampo sa ilang pagkapopular sa mga magpapanaw,” matod ni Publicus.
Base sa datus sa Bohol Tourism Office (BTO), padayon nga gidominar sa mga lokal nga turista ang mga turistang nangabot sa Bohol sa 68.10 porsiyento.
Sigon sa BTO, may kabug-usan nga 362,306 ka turista ang nagbisita sa probinsya gikan sa Enero 1, 2023 kutob sa Mayo 31, 2023 diin 246,744 niini ang mga domestic traveller.
Sa samang datus nagpakita nga ang ihap sa mga langyaw nga turista nga mibisita sa isla nga probinsya sa samang panahon anaa sa 114,562 o 31.90 porsyento sa kinatibuk-ang nangabot.
Kadaghanan sa mga turista mga Koreano sa 45,100. Gisundan sila sa mga Taiwanese ug Amerikano sa 8,991 ug 8,270, matag usa.
Sa laing bahin, ang Baguio City maoy ikaduha sa survey sa Publicus diin 16 sa mga respondents mipili sa pagbisita sa gitawag nga “summer capital.” Gisundan kini sa Cebu ug Siargao nga parehong adunay siyam ka porsyento ug Boracay nga adunay otso porsyento.
Ang mga sample giapod-apod sa lima ka geographical nga mga lugar, National Capital Region, North Central Luzon, South Luzon, Visayas ug Mindanao ug naglakip lamang sa mga rehistradong Filipino nga botante. (RTB)
