NAGKANTIDAD og P2.1 bilyones nga infrastructure projects ang gigahin ni Segundo Distrito Kongresista Van-van Aumentado alang sa maong distrito ilawom sa General Appropriations Act (GAA) 2023.
Mao kini ang malipayong gipaambit sa babayeng magbabalaod pinaagi sa social media, Hunyo 28, 2023.
Ang Implementing Agency mao ang DPWH-District Engineering Office 2 (DEO 2).
Matud ni Kongresista Van-van, ang maong pundo gamiton alang sa paghimo og mga kalsada, bridges, flood controls, waterworks system, covered courts, Brgy Halls ug uban pang proyekto sa imprastruktura.
Niingon si Van-van nga “gisugdan na, ang uban for implementation na usab.”
Pinaagi sa maong dakong pundo, daghang mga lungsod ug barangay ang matabangan lakip na ang daghang sulbarunon sama sa kalsada ug uban pa.
Panaad ni Kongresista Aumentado nga magpadayon kini sa pagbuhat og mga maayong lakang alang sa iyang gimahal nga Segundo Distrito.
“Pero dili ta mohunong sa pagpaningkamot hantod dili mahuman ang atong mga maayong tinguha para sa atong pinanggang Segundo Distrito,” matud niini.
“Kini ang inyong ubos nga Kongresista andam kanunay sa paghatag og tinud-anay nga serbisyo,” dugang niini.
Prayoridad sa mga Aumentado nga pa-abante-hon ang Segundo Distrito ilabina gisigehan kini og saway nga pinakapobreng distrito sa Bohol.
Sayon ang pagkab-ot niini ilabina ana-a sa puwesto ang tulo (3) ka Aumentado nga mao sila si Gobernador Aris Aumentado, Bokal Jamie Aumentado Villamor ug Kong. Van-van. (Wilson Auguis Subrio)
