KINI gipamulong ni Governor Aris Aumentado atul sa Full Council Meeting sa Provincial Development Council niadtong Mierkules, Hunyo 21, 2023, tinambongan ni Vice Governor Victor Balite, mga Sangguniang Panlalawigan Members, mga mayors, mga hepe sa nagkalain-laing ahensya sa atong kagamhanang nasyonal ug probinsyal, ug mga tinugyanan sa civil society ug business sector.
Gihatud kanato ang lab-as nga balita pinaagi kang Francis Batoy, lider sa tanang Non-Government Organizations (NGOs) ning atong lalawigan. Ako sab kining gi-asoy dayon sa mga organic farming advocates ug perte nilang lipaya nga nakadawat sa maong balita tungod kay dugay na silang nakigbisug aron ipatunhay ang Organic Farming o chemical-free farming dinhi sa atong hinigugmang Bohol, ug dili ang GMO.
Unsa man diay kanang GMO? Genetically-Modified-Organism. Gihilabtan ang mugna sa Dios. Ang kemikal nga makahilo sa peste, gibutang na mismo sa tanum aron dili na kuno kini takbuyan sa maong peste. Didto sa Europe, tanang produkto nga dunay sagul nga GMO butangan gayud og label aron ang konsumidor adunay kasayuran kon unsa ang ilang gikaon. Tiaw bay kemikal nga para unta sa peste isulod na sa imong lawas pinaagi sa imong pagkaon?!
Tungod niini inabagan sa Southeast-Asia Regional Initiatives for Community Empowerment kon SEARICE, Bohol Nature Conservation Society kon BONACONSO, Bohol Initiators for Sustainable Agriculture & Development kon BISAD, Diocese of Tagbilaran Social Action Center, ug daghang alyansa sa mga mag-uuma, si Governor Erico Boyles Aumentado ug Vice Governor Julius Herrera, niadtong tuig 2003, mipatuman sa Ordinansa ug mga Resolusyones nga naghimo sa Bohol nga GMO-Free.
Segun sa maong mga palisiya, gidili ang pagtanum og GMO dinhi sa Bohol. Busa, dili ikatingala nga ipatuman gayud kini ni Governor Aris Aumentadto tungod kay kini usa ka maayong legacy sa iyang bantugang amahan. Lakip usab ang Senior Board Member niadtong higayona, si Atty. Dionisio Dajalos Balite, ug karon City Mayor Jane Yap, nga kaniadto Board Member nga nag-representar sa Sangguniang Kabataan, apil sila nga namirma ug niduso sa maong ordinansa.
Bug-at kaayong hinungdan ang panglawas sa atong katawhan. Dili kini mahimong isugal lamang sa usa ka teknolohiya nga walay kasiguruan. Mismo ang Supreme Court mipatuman sa Writ of Kalikasan batok sa GMO.
Kadtong mga pro-GMO, ako kamong gihagit! Kon sa inyong pagtuo luwas ang maong produkto, kini ang ipakaon sa inyong mga anak ug mga apo. Aver og di ba mo maguol ug mangandam sa daghang tambal ug ospital.
Apan ang labing bug-at nga hinungdan kon nganong angay ipabilin ang Bohol nga GMO-Free, mao kini: KITA ANG LABING UNANG GEO-PARK SA TIBUOK PILIPINAS, UG UBOS SA MGA LAGDA SA UNITED NATIONS ALANG SA MGA GEO-PARK, SUSTAINABLE DEVELOPMENT (DIIN LABING DAKUNG TIPIK ANG SUSTAINABLE AGRICULTURE) MAOY IPATUMAN SULOD SA USA KA GEO-PARK!
