Ni Wilson Auguis Subrio
Na-grasyahan og suma-total nga P530,000.00 ang upat (4) ka mga barangay sa lungsod sa Antequera gikan sa Kagamhanang Probinsyal sa Bohol (PGBh).
Kini ang gipaambit ni Gobernador Aris Aumentado sa mga Bol-anon pinaagi sa social media.
“Gusto nato nga aduna kita’y relasyon sa mga kabarangayan ug sa mga katawhan niini, ug sa pagbisita nato sa upat ka mga barangay sa Lungsod sa Antequera, nakamugna kita og mas lig-on nga relasyon ngadto kanila. Pinaagi sa pagtunol nato sa mga tseke gikan sa Kagamhanang Probinsyal, mapabati nato kanila nga anaa kita, niduyog sa ilang pag-uswag,” matud ni Gob. Aris, kinsa maoy nidala sa maong mga financial assistance.
Ani-a ang 4 ka mga barangay nga nakadawat og ayudang-pinansyal:
Barangay Mag-aso, Antequera – P200,000 alang sa pagsemento sa ilang Barangay Road.
Barangay Canlaas, Antequera – P200,000 alang sa konstruksyon/paghuman sa Multi-Purpose Building.
Barangay Bantolinao, Antequera – P70,000 alang sa selebrasyon sa ika-14 na Foundation Day sa maong barangay. Gikan kini sa mga buhatan nila ni Vice Governor Dionisio Victor Balite, Board Members Benjie Arcamo, Aldner Damalerio, Lucille Lagunay, ug Romulo Cepedoza.
Barangay Quinapon-an, Antequera – P60,000 alang sa pag-improve sa upat (4) ka mga kiosko. Gikan kini sa buhatan ni BM Damalerio.
“Gipahinumduman usab nako sila nga i-liquidate dayon ang maong mga ayuda aron mahatagan pa sila sa ubang financial assistance, ilabi na ang P200,000 para sa priority project sa barangay,” matud sa amahan sa probinsya.
