MATUD sa GMA News 4.2 Million ka pamilyang Pilipinhon ang gigutom. Klaro na ha, pamilya. Sa atong nahibaw-an, sa mga surveys, kada pamilyang Pilipinhon iphon nga may 5 ka myembro, duha ka ginikanan ug 3 ka anak. Sa ato pa, 4.2 million pil-on og ka-5 mokabat sa 21 million ka mga Pilipinhon ang gigutom. Mao na higala, igsoon, 21 ka milyones nga mga Pilipinhon ang nag-ilaid sa kagutom. Mao nay gibalita sa GMA News.
Dayag na lang nga ang hinungdan niining maong kagutom mao ang pandemia ug korapsyon. Ubos sa “Bayanihan To Recover As One”, 98 Billion Pesos ang gigahin kuno nga kwarta. 77 Billion ra kuno ang gi-release. 21 Billion ang nahibilin? Saa na man ni? Ubos sa Bayanihan Two kuno, 660 Billion Pesos ang gigahin ug 487 Billion Pesos lamang ang na-release. 173 Billion ang nahibilin? Saa ra man ni? Ubos sa Bayanihan 3 kuno, 401 Billion ang gigahin? 98+660+401 = 1 Trillion 159 Billion Pesos? Ang maong alegasyon naghisgut sa niaging administrasyon.
Tsk tsk di man gyud ta brayt og Math. Pero bisag tinambanon na lang nato pagkwenta pinaagi sa pagbahin sa 77 Billion Pesos (ang kantidad nga gi-release ubos sa Bayanihan One pa lang) ngadto sa 21 million Filipinos nga gigutom, kada pamilya makadawat na sa dakung hinabang nga di mokubos sa 18 Thousand Pesos. Di na gyud sila gutmon ana unta. Pero gigutom man. Buot ipasabut, ang kwartang para unta nila, wa nila madawat.
Perteng dakuas haw-ang. Ang dakung haw-ang sa mga bilyones nga didto sa kamut sa atong mga lideres ug ang 21 milyones nga mga gigutom nga Pilipinhon. Dugang pa niana, may impormasyon nga perteng dakuas kwarta nga wa ma-release. Unsaon man nato ni pagsabut ang maong misterio? Dis-a man padung tong mga bilyones?
Apan midaug man pagka-Bise Presidente si Sara Duterte. Nagpasabut ba kini nga ang 21 million nga gipanggutom nga mga Pilipinhon nahigugma gihapon sa mga Duterte? Ok ra nilag magutman sila basta kay si Duterte gihapon? Mao ba gyud?
O ba kaha, kining mga panatiko wa masayud bisan sa tinamban natong kwentada kabahin sa mga bilyones nga alang unta kanila? Nasayud ba kaha sila nga ang mga Facebook posts nga kanunay nilang madawat mga butbot nga pangangkon ug pekeng impormasyon nga kasagaran inimbentong mga balita nga hinimohimo sa mga binayran nga trolls? Nasayud ba kaha ni sila og unsay trolls? Nasayud ba kaha sila sa kamatuoran kabahin sa mga human rights violations, extra-judicial killings, pagpakauwaw sa kababayen-an, ang gikatahong pag-surender sa West Philippine Sea, ug pagpakatuta ngadto sa Communist China?
Kung nasayud sila niining tanan, apan gihigugma gihapon nila ang mga Duterte, aw, di na ta maglalis pa. Nahiagum kita sa atong gibotohan. Mirese pud kung nagutman ta. Di na ta magdebate o mag-away pa.
Ang panultihon karong semana gikan kang Pope Francis: “Corruption is paid for by the poor”.
