NAKATILAW na ba mo sa Banana Chips sa Jagna? Naay ordinary. Naa puy hot o hang-hang. Naa puy cheesy flavor, ug uban pa.
Abi ninyog Calamay ray sikat sa Jagna? Sulayi ang ilang banana chips. Lami gyud.
Nakatilaw na ba mo sa Milk products sa Ubay? Mga genuine nga gatas nga may Ube, Mango, Vanilla ug uban pang flavor. Tilawi aron motuo mo. Ube flavor ahong paborito.
Maka-imagine kos ahong Katsilaong amahan og makatilawg lami moingon gyud og: “Fuerte, fuerte”.
Ang Coconut Chips sa kooperatiba sa mga kababayen-an sa lungsod sa Pilar, lami-an, ug tugob sa sustansya. Talagsaon kini. Wa ko magtuo sa una nakung tilaw nga gikan ra diay dinhis ato tong produktoha. Ato gyung ika-pasigarbo. Dili kaayo tam-is. Way kuyaw sa diabetes.
Ang Squash Noodles sa Mabini ila pung ikapanghambug. Ang Squash Nachos sa Balilihan, garbo usab sa mga Balilinhon. Nia man diay ning mga produktoha; nganong mangita pa man tas mga imported? Makatabang pa tas atong mga katagilungsod, ug ekonomiyang Bol-anon.
Imbis nga kanang mga way-bitaminang mga junk food o chichirya inyong paliton, atong produkto maoy pangitaa. Healthy Boholano products. Naa na sa atong mga malls ug groceries.
Imbis nga way-bitaminang mga softdrinks ang inyong imnon, imna ang mga gatas nga produkto sa atong probinsya. Makapahimsog pa.
Kini ug daghan pang Bol-anong mga produkto ang atong ikapasigarbo sa tibuok kalibutan.
Syempre, naa gihapon ang Calamay sa Jagna ug Albur, ang Alupe sa Bilar, ang mga Sikwateng Pinari sa bisan-asang suok sa atong syudad ug lalawigan, lawot-lawot ug di mabugto; mga budbud, suman, dinumugan, puto ug bibingka, nilamaw nga butangag parat-parat nga crackers, Kabkab nga dayan-dayanan sa latik, biko, puto-maya, ug original nga pastries sa pamilyang Pernia.
Kining naulahi, gimingaw na gyud ko. Apil sa gitawag og “fond memories of my childhood”.
Daghan pang mga lami-ang pagkaon ning atong pinanggang lalawigan nga mahimo natong hisgutan dinhi. Apan karon, mga snacks lang una maoy atong gipunting kay dili ma-igu ang atong lindog kon iapil pa ang mga sud-an ug kinhason nga kinaham sa tanan.
Hinumdumi: Sa sunod nimong pangompra, Bol-anong produkto maoy pangitaa!
