ADUNAY kalambiigitan ang paghinusol ug pagkabanhaw. Kini kon ang mga nahisulat sa Balaang Kasulatan ang maoy hisgutan. Ang nahisulat niini maoy mga pulong sa Labawng Makagagahum. Magamit kini aron pagtudlo, pagbadlong, pagtul-id ug pagmatuto alang sa maayo aron nga ang alagad sa Ginoo mahimong hingpit sa mga angayg buhaton. (2 Timothy 3:16-17). Sa panahon sa paghandum ug pagsaulog sa Semana Santa, ang mga katawhang Kristohanon nagbangotan tungod sa pagkamatay sa bugtong anak sa Diyos alang sa kapasayloan sa mga sala sa kalibotan. Ang katawhan namalandong sa ilang mga kasal-anan, naghinulsol ug midawat kang Kristo nga ilang manluluwas.
Ang pagpa-abot sa pagkabanhaw nahisgotan sa mga nahisulat sa bibliya. Sa Libro ni Ezekiel, gilantaw ang pagkabanhaw sa mga maayong mga taga Israel gikan sa kamatayon. Sa Basahon ni Daniel, nahimong paglaum ang pagkabanhaw sa mga taga Israel, diin ang mga Isrealitas mabanhaw. Mosunod niini ang paghukom. Ang pagkabanhaw ni Kristo, maoy nahimong sentro sa doktrinang Kristohanon. Gibasi kini sa pagtoo nga si Hesukristo gibanhaw gikan sa mga minatay tulo ka adlaw human sa iyang kamatayon didto sa krus. Pinaagi sa iyang pagbuntog sa kamatayon, ang tanang magtutoo maka-ambit sa iyang kadaugan batok sa sala, kamatayon ug sa yawa. Ang kasaulogan sa kadaugan mao ang Pasko sa Pagkabanhaw.
Ang Pasko sa Pagkabanhaw usa ka dakong kalihokan sa katilingbang Kristohanon. Ang upat ka mga basahon sa Ebanghelyo nga gisulat nila ni Mateo, Marcos, Lucas ug Juan, nga naghisgot sa pagkabanhaw ni Kristo gikan sa mga minatay, makita usab sa mga nahisulat sa Bag-ong Basahon, ilabi sa mga sulat ni San Pablo (1 Korinto 15). Matud pa sa nahisulat, mga babaye nga disipulo miadto sa lubong ni Hesus nga didto sa gipahimutang sa harden ni Jose nga taga Arimathea. Si Jose usa ka sakop sa Sanhedrin ug usa ka hilum nga disipulo ni Hesus. Ilang nakita ang bato nga gigamit pagsira sa lubnganan nga nabalhin na kini ug wala na ang patay.
Ilang gipahibawo si Pedro ug ubang mga apostoles mahitungod sa pagkawala sa patayng lawas ni Hesus. Human niini, adunay nakakita ni Hesus didto sa Herusalem, gani misulod sa usa ka lawak nga nakakandado. Diha usay nakakita kaniya didto sa Galeliya. Hinuon ang paghisgot nga si Hesukristo dinhi sa kalibotan sulod sa 40 ka adlaw sa wala pa siya mosaka sa langit, nahisulat sa “Buhat sa mga Apostoles”. Ang paghinulsol kabahin sa angay buhaton aron maluwas. Ang pag-angkon sa tawo nga siya makasasala maoy bunga sa paghinulsol. Ang pagdawat kang Hesus nga maoy manluluwas makahatag ug kinabuhing dayon.
