KARON kay Semana Santa naman, tinghinulsol na. Di gud unta, kada adlaw gud unta ang paghinulsol nato. Pero, naandan na man. Sige lang, wa mampuy dautan kon atong buligan kining nasandan na nga maayong gawi.
Atong hinuklogan ang mga bulawanong tambag sa giilang Santo sa Nonviolence nga si Mahatma Gandhi.
Si Gandhi ug ang balo nga nagbangotan. Daghang mga tawo ang moduol kang Mahatma Gandhi aron magpatambag bahin sa ilang mga suliran sa kinabuhi. Usa ka adlaw niana, usa ka bawo ang miduol kaniya ug miingon: “Sir, tabangi ko kay perte nako’ng guola sukad nga namatay akong bana. Unsay akong buhaton aron maulian ko?”. Mitubag si Gandhi: “Sige, suruya ang tanang panimalay sa inyong baryo ug pangayo’g bugas sa kada balay nga imong masak-an diin wa pay namatay”. Paglabay sa tulo ka adlaw mibalik ang babaye kang Mahatma Gandhi. Nangutana si Gandhi: “Kumusta na man, hain na man ang imong pinangayo’ng bugas?”. Mitubag ang babaye: “Salamat Sir, naayo na ko. Wa ko’y nada’ng bugas pero naka-amgo na ko nga ang tanang panimalay namatyan naman gyud diay”.
Matud ni Mahatma Gandhi ang pito ka labing makalilisang nga sala mao ang: Bahandi nga naangkon dili bunga sa paningkamot, kalipay nga way konsensya, kahibalo nga way maayong kinaiya, negosyo nga way moralidad, siyensya nga dili makitawhanon, pagsimba nga way sakripisyo, ug politika nga way prinsipyo.
Og karon kay summer na man, daghang mga sakit ang posibleng motakboy kanato. Ilabi na ang heat stroke tungod sa hilabihang kainit. Sa wa damhang kahigayonan, duna koy nakaplagan nga tambag bahin sa panglawas nga gikan sa Bibliya.
Health Tip sa Bibliya. 2 Thessalonians 3:10: Those who do not work should not eat. Ang dili motrabaho, dili angayng mokaon. Sa unang basa naku ining bersikuloha nakaingon ko nga labihay pu’ng istriktoha sa Ginoo. Tiaw ba’y di ka pakan-on kon di ka motrabaho. Unsaon na man lang ang mga bakol ug mga paralitiko. Apan kon atong hinuktukan, tugob sa kaalam ang maong panultihon. Kay segun sa scientific research, 40% ra sa atong gikaon ang gikinahanglan sa atong lawas. Ang 60% niini usik lang, ug makadaut pa gayud sa lawas. Dayag na lang nga kung wa ka mogamit sa imong kusog o enerhiya ang pagkaon makadaut sa imong lawas. Ang resulta high cholesterol, hypertension, ug uban pa.
Have a meaningful Holy Week, everyone.
