MAO KINI ang gitawag og “Golden Rule” nga angay hinumduman sa matag usa kanato.
Ang Ginoo subay sa Balaang Kasulatan (Bibliya) niingon nga kon “Bun-on ka og bato, bawos pinaagi sa pagbuno og pan.”
Karong panahona, mura’g imposible na gayud kaayo nga anaay mobuhat niini nga kon bun-on og bato, mobawos sa pagbuno og pan.
Daghan sa atong kaigsoonan nga lagmit nakalimot na sa maong golden rule.
Bisan pa siguro ang mga maayo og batasan o buotan, moabot ang panahon nga mosukol na gayud kon sobra na ang kasakit o panamastamas o pagdaug-daug nga ilang nasinati.
Kon sauna anaay manumbag, bawsan usab og sumbag. Apan karon, kon anaay manumbag, bawsan og kutsilyo, dunggabon.
Ang uban nga mogamit og kutsilyo, bawsan og armas o pistola.
Sa pang-gobyerno ug pamolitika, kon dili ka gustong kasuhan, ayaw usab pangkiha.
Kon gusto kang dili mapriso, ayaw pangawat, ayaw panglimbong ug ayaw pag-abusar sa imong gahum o posisyon.
Kon dili ka gustong hukman, ayaw usab panghukom sa imong isig-ka-tawo. Ayaw pagtumo-tumo og istorya.
Apan lage kay tawo man kita, kadaghanan kanato makabuhat og mga sayop o mga paglapas.
Bawos-bawos ra kuno ang kinabuhi. Ug motuo gayud ko niini.
Kon kuwartahan ka unya tihik, tig-a o daw-an ka, moabot ang panahon nga mapurdoy ka o mahanaw ang imong salapi, grasya o kabtangan.
Moabot gayud ang karma o gaba o pagpaningil sa panahon batok nimo, nako o nato kon sobra na ang atong nabuhat nga dili maayo.
Kon gikasilagan ka sa ubang tawo o imong kaaway, bawsi og gugma ug pasensya.
Dili man tuod sayon o dali ang pagbuhat niini sa tanang higayon, apan sulayi. Buhata.
Samtang magka-anam og taas ang atong pangidaron, magkataas usab ang atong ang-ang sa atong kaalam ug kamao na mosabot o motimbang-timbang sa mga butang o panghitabo.
Busa, ayaw buhata sa uban ang dili nimo gustong buhaton sa uban diha nimo.
Ang mas maayo, buhata ngadto sa uban ang gusto nimong buhaton diha nimo… nga legal ug positibo.
Niining tanan, pabiling mapahiubsanon apan ayaw patamak kon ana-a ka sa sakto ug makatarunganong.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
