ANG atong tema karong semanaha paningon sa Semana Santa, bahin sa pulong “surrender”. Nakurat na lang ta pagpakli nato sa mga English-Binisaya dictionary diin usa diay sa Binisaya sa surrender, pag-ampo.
Tanan man gyud ta mobiya sa atong pisikal nga lawas. Panahon lay managlahi, dili pud nato pagbuot. Matud pa, moabut kini sama sa kawatan panahon sa kagabihon, di gyud magpahibawo. Apan samtang kita nakigbisug pa ning kinabuhi, ang tabang ug gugma gikan sa atong mga higala, paryente, ug kauban sa buhat sama sa mga kamot sa Dios ug sa iyang mga angheles nga nag-aghat kanato pagtunhay.
Sa labing pait nga yugto hinuon, nga daw sa wa ka nay kusog, luya na kaayo, galisud na bisan pagginhawa, wa nay laing paingnan pa, kon dili ang pag-SURRENDER. Ang katapusang pag-ampo mao gayud kini, “Ang Imong pagbuot maoy matuman, Lord”. Karon, gihatagan pa tag dyutayng kusog ug kadasig aron pagtunhay. Naaghat kita pagtuki sa mga sinuwat sa mga balaang kababayen-an ug kalalakin-an gikan sa nagkalain-laing relihiyon, pagtuo, tradisyon ug ispirituwal nga panglantaw kabahin sa, surrender.
“Resign ug surrender lang nadto sa Iyang Balaang Kabubut-on (Divine Will).
“Dili Siya maaghat sa mga pulong lamang, kon dili, buhat – if you love me, keep my commandments. Kon mahimo mo kini; kon imong mabuntog ang kaugalingon ug i-surrender sa Tiilan sa Magtutudlo, imong makita ang Iyang gahum sa tanang aspeto sa imong kinabuhi.
“Gugma ra gayud ang bugtong tambal sa kasamuk nga imong gihisgutan. Gugma ang sinugdan ug katapusan sa Ispirituwalidad. Ang Gugma nasayud sa serbisyong way pagtamud sa kaugalingon, sakripisyo ug self-surrender. Si bisan kinsang interesado sa ispirituhanong kalambuan kinahanglang maglikay sa serbisyong gipunting sa pagpasikat. Ang serbisyong way pagtamud sa kaugalingon mao na ang iya mismong ganti. Ang Gugma nga gihisgutan sa mga Magtutudlo, usa ka matang sa gugma nga wala gayuy tipik alang sa kaugalingon.
“Kon walay hingpit nga pag-surrender sa tanang garboug interes sa kaugalingon, ang disipulo dili makakab-ot sa tiningub nga pagpunting sa tanang gahum nga maoy gikinahanglan alang sa kalambuan sa kinahiladman. Ang maong gugma ug self-surrender ngadto sa kabubut-on sa Ginoo, maoy yawe sa tanang pagtulun-ang mistiko. Ang imong tahas, isip disipulo, mao ang pag-ugmad ning maong mga gawi sa tumang pagpaningkamot ug itugyan ang resulta ngadto sa Ginoo.
“Sa makadaghan biay-biayon kita sa atong isig-ka-tawo ug pugngan sa mga kadagkuan ug lig-ong institusyon. Apan kon kita naka-angkla na sa gugma ug hingpit nga self-surrender, wala nay makatarug sa kalinaw sa atong kinahiladman.
“Ang tinuod nga binataha sa natad sa ispirituwalidad dili makit-an sa gawas, kon dili ania sa kinahiladman. Wala magmapasabut nga malampuson ka na tungod kay wala nay nisupak kanimo. Ang kalampusan nag-agad sa hingpit nga pag-surrender ug gugma; gani, ang mga pagsulay mahimo pang makapalig-on sa imong kalambuan. Apan kining katakus pagbuntog sa garbo ug hingpit nga pag-surrender sa kaugalingon ngadto sa Dios talagsaon pa kay sa labing bililhon nga diamond.
“Himoa ang gugma ug self-surrender nga pundasyon sa imong kinabuhi. Buhata kini ug imong masaksihan nga panalanginan ka sa matag-adlaw.
“Bisan unsa pang mga pagsupak, o opinyon sa uban, kon mi-surrender kana sa hingpit ngadto sa gugma sa Ginoo, wala nay makatarug sa imong kalinaw sa kinahiladman. Bulahan ug balaan gayud kadtong mi-surrender na sa ilang kaugalingn ngadto sa kabubut-on sa Dios. Tinuod kang sumusunod sa Dios. Ang uban dili na importante.
“Hingpit nga pag-surrender ngadto sa Iyang Kabubut-on ug Kagustuhan maoy labing segurado ug luwas nga dalan paingon sa kalambuan sa kinahiladman.
“Ang Dios motabang niadtong motabang sa ilang kaugalingon. Puy-i ang mga pagtulun-an sa Ginoo. Kini magdala sa pagkamapahiubsanon, gugma ug surrender. Ang ubang butang mosunod na sa hinay-hinay ug mahilis ang garbo.
“Ang hingpit nga pag-surrender usa ka pangamuyo sa Iyang Kaluoy ug si bisan kinsang mosalig niini gantihan gayud sa makadaghan. Ang tanang moabut kanimo gikan sa Balaang Gahum dayag na lang nga gikinahanglan mo alang sa imong ispirituwal nga kalambuan.
“Ang hingpit nga self-surrender ngadto sa Dios maoy sekreto sa tinuod nga nahigugma Kaniya.
Kining tanang mga tambag sa mga santos ug makinaadmanon, mas sayon sultihon, basahon ug hunahunaon kay sa buhaton. Apan kon halos wala ka nay kapili-an pa, ang pag-surrender maoy labing maayo ug tininuod nga lihuk. Gawas pa, kining mga balaang kababayen-an ug kalalakin-an balaan tungod kay ilang gibuhat ang ilang gisulti. Hinaut nga angayan kita sa ilang pag-giya.
