SIYAM na lang ka mga armadong rebelde ang nahibilin sa ilang himatyon nga kawsa ubos sa Communist Party of the Philippines / New People’s Army (CPP-NPA) nga nagtago-tago aron mabuhi sa hinterland areas sa mga lungsod sa Balilihan ug Batuan.
Suma pa nga hapit na madakpi ang pito ka mga sakop sa grupo ubos ni Domingo Compoc alyas “Kumander Cobra” dihang nakit-an sa mga tropa sa Philippine Army sa barangay Hanopol, Balilihan sa nakalabay nga Marso 2, 2023.
Si Major Jessie Batiller, civil-military operations head sa Philippine Army nitug-an nga sa pag-aksyon sa A-1 nga impormasyon gikan sa usa ka residente, ang mga tropa nagdali paingon sa hinterland Sitio Lusad, Purok 3 sa Hanopol Norte sa lungsod sa Balilihan.
Ang 10-minutos nga pagbinayloay sa bala sa mga tropa sa gobyerno nakapugos sa mga rebelde sa pagbiya sa ilang temporaryong kampo sa Balilihan.
Nasakmit human sa engkwentro ang duha ka hand grenade, usa ka rifle grenade, ug usa ka magazine sa AK47 nga adunay mga buhing bala ug walay kaswalti sa duha ka panig.
Sa laing bahin, si Gobernador Aris Aumentado nga mibisita sa mga bakwit nikompirmar sa intelligence report nga anaa na lang sa siyam sa grupo ang nahibilin taliwala sa kalisod kon unsaon nila pagpakaon sa ilang kaugalingon sa hinterland barangay.
Matod niya nga nagkagamay na ang grupo ni “Kumander Cobra” bisan pa nga iyang gibutyag nga usa sa nahabiling mga rebelde anak mismo ni Kumander Cobra.
Ang gobernador nagdumili sa pagkomento sa ubang mga taho aron dili masabutahi ang himoon pa unyang operasyon sa military batok na sa walhong pundok. (RTB)
