NANAWAGAN si bise-gobernador Victor Balite ngadto sa mga nagbuhi og baboy sa lalawigan nga kinahanglan gyud silang mokooperar ug i-report dayon sa barangay kun nagluya ang ilang mga binuhing baboy tungod sa pagkatap na sa African Swine Fever sa lalawigan sa Sugbu.
Sa higayon nga ma-report kini sa barangay, maghimo dayon kini og koordinasyon ngadto sa Department of Agriculture (DA) aron makuhaan og blood samples ang kadudahang baboy.
Nagkanayon si Balite nga dili angayan tago-tagoon ang maong kahimtang ilabi na nga naghisgot kini og kagaw.
Tumong sa maong pamaagi nga mamintinar ang pagka-ASF Free sa lalawigan diin gihingusgan na sab karon sa Bohol ang mga border control.
Sumala pa sa Office of the Provincial Agriculturist (OPA) nga base sa subsob nila nga blood collection ug surveillance, malikayan gyud ang pagsulod sa ASF dinhi sa lalawigan.
Nasayran nga ilaha gyud nga kumpiskaron ang mga produktong baboy nga mosulod sa Bohol nga walay saktong dokumento.
Sundon usab nila nga naa sa executive order ni Gobernador Aris Aumentado nga giisyu sa karong bag-o nga automatic nga ma-ban sa pagsulod dinhi sa Bohol ang mga baboy nga gikan sa mga lugar nga nagpositibo sa ASF kun diin usa na niini mao ang Dakbayan sa Carcar.
Giawhag usab ang mga nagbuhi og baboy nga imentinar ang disinfection sa ilang baboyan.
Alang usab sa mga mangompra og karneng baboy, kinahanglan usab nga i- check kanunay ang Meat Inspection Certificate sa gipalitan nga tindahan aron masiguro ang kaluwasan niini. (RTB)
