NAKABALIK na sa double digits ang ihap sa mga aktibong kaso sa coronavirus disease (COVID-19) sa Bohol, sa labing bag-o nga taho sa Bohol Inter Agency Task Force niadtong Marso 1.
Gikan sa 1,125 ka aktibong kaso niadtong Enero 31, mikanaug na sa 67 sa Marso 1, o 30 ka adlaw gikan niadtong miabut pa sa three-digits ang ihap sa milabay nga buwan.
Ang pagkanaug sa kaso, usa sa mga gibantayan ug gikahinaman nga pag-us-os kay ang mga katawhan nangandoy na nga ikapabalik ang bag-ong normal diin dili na kahadlokan pa ang sakit.
Ang pagkanaug sa mga aktibong kaso sa COVID, sagad nga gipasangil sa nagkalapad nga pagpamakuna ug sa nagakat-on nga katawhan sa mga gipatuman nga minimum public health protocols aron dili matakdan ug dili usab makatakod sa sakit.
Hinuon, ang pagkaubos na sa mga aktibong kaso sa COVID, nagtakin pa gihapon sa dili maayong balita.
Sukad sa Mayo niadtong 2020, kanus-a natala ang labing unang kaso sa pagkamatay tungod sa COVID, mikabat na karon sa 667 ka kaso sa kamatayon nga naangin sa hilabihan ka mananakod nga sakit.
Sa usa ka tuig ug sikam ka buwan, ang 667 ka kamatayon naghatag sa average nga usa ka kinabuhi ang gikutlo sa COVID sa milabay nga mga buwan taman karong adlawa.
Tungod niini, padayon ang pag-aghat sa kagamhanan ngadto sa mga katawhan nga dili pakyason ang pagpabakuna samtang kini libre pa.
Human na nag-una nga mga sector nga gihatagan og pagseguro nga una mabakunahan kay sila anaa sa daku nga kakuyaw nga matakdan, gibuksan na sa kagamhanan ang pagpamakuna sa mga katawhan nga wala maapil sa priority sectors.
Kahinumduman nga giuna sa pamakuna ang mga medical frontliners, sunod ang mga senior citizens dayon ang mga indibidwal nga mga mga sakit na nga gihambin.
Dayun gibuksan usab sa kagamhanan ang pamakuna sa mga trabahante ug mamumuo sa mga sector nga gikinahanglan aron makalihok ang ekonomiya.
Human niini, gibuksan na usab ang pamakuna sa mga kabataan 18 anyos pataas ug sa 17 anyos ngadto sa napulo ug duha ka tuig.
Niiing bag-o pa lamag gibuksan na usab ang pamakuna sa 11 anyos paubos sa 5 anyos, aron pagpalapad sa ektor nga mabakunahan batok sa COVID-19.
Ang pagpamakuna nagpadayon pa gihapon sa mga Rural Health Units, sa mga designated vaccine sites ug giabagan pa gihapon sa mga mobile vaccine teams nga nagsuroy sa mga kabarangayan aron mamakuna.
Kini sanglit, makabalik lamang ang katilingban sa bag-ong normal kon makaabut na sa 70 porsyento ang nabakunahang senior citizens ug mga indibidwal nga may comorbidities, ug magpadayon pang mag ubos ang kaso sa COVID dinhi. (RAHC/PIA7 Bohol)
