GIBUK-SAN kaniadtong Marso 2, 2023 ang ika-92 nga national assembly sa League of the Vice-Governors of the Philippines (LVGP) sa Bohol.
Gipangulohan ni Laguna Vice-Governor Atty. Karen Agapay kinsa mao ang LVGP national president ang upat ka adlaw nga kalihokan nga natapos kagahapon, Marso 4.
Samtang mainitong gi-welcome ni Vice-Governor Dionisio Victor Balite, kinsa mao ang Region 7 Director sa LVGP ang mga bise-gobernador sa pagbukas sa kalihokan.
Gihimo ang 92nd LVGP national assembly didto sa Bellevue Resort Panglao, Bohol.
Ang Overseas Workers Welfare Administration (OWWA) pinangulohan ni Administrator Arnaldo ‘Arnel’ Ignacio ang gidapit nga mamulong sa pagbukas sa ilang assembly diin gituki ang mga problema ug aksyon sa ilang buhatan labot sa mga suliran sa Overseas Filipino Workers (OFW).
Mihimo usab sa countryside tour ang mga 38 ka bise-gobernador sa Pilipinas nga nitambong sa asembleya diin ilang gibisita ang nag-unang talan-awon sa Bohol nga naglakip sa Chocolate Hills sa lungsod sa Carmen, ang Loboc River Cruise sa Loboc ug uban pa.
Subay niini, ang kagamhanang probinsyal sa Bohol pinangulohan ni Governor Aris Aumentado ang mohimo sa paghost sa ilang panihapon gabie niadtong Biyernes, Marso 3, 2023 sa New Capitol sa Tagbilaran. (RTB)
