“THERE IS NOTHING CONSTANT in this world except CHANGE,” suma pa sa usa ka panultihon.
Ug kini usa ka kamatuoran ilabina kanatong katawhan — lumalabay lamang kita niining kalibutana, dato ka man o pobre, gamhanan ka man o dili, kitang tanan mobalik ra sa abo, mosugot man kita o dili.
Wala gayuy permanente niining kalibutana bisan sa politika, gahum, popularidad ug bisan ang salapi lumalabay lamang inig abot sa panahon.
Mokupas bisan ang orihinal nga maong.
Malawos ang buwak ug mangadaldag ang dahon. Tanan matapos.
Daghang mga takna sa atong kinabuhi nga paminaw nato lisod kaayo, lisod kaayong humnon ilabina ang mga problema, kasakit hasta utang, apan, wala kuno’y suliran nga dili masulbad.
Aw hinuon, alang sa uban, naa man kuno… kamatayon. Mahuman ang tanang gibad-ay sa abagahan kon mahutdan na sa ginhawa. Mura.
Karon nga ani-a kita sa nagkadaiyang mga problema, usahay ang uban kanato makahunahuna na og surrender.
Ang kasakit matud pa, takus nga makigkaluha sa kalipay diha sa iyang talidhay tadlas sa kasing-kasing sa kangitngit.
Tungod kuno sa kasakit ug mga unos sa kinabuhi, usahay mawad-an kita og paglaum, ug usahay kon dili man kanunay, motamak sa tahiwing dalan.
Tawo lamang kita ug huyang kuno. Kapuyon. Apan kinahanglan usab nga magmalig-on kita ug magbaton og kusog kon gusto pa kitang molahutay niining kalibutana.
Kinahanglan oositibo ang panglantaw sa kinabuhi bisan pa man sa mga kapakyasan nga nahiaguman. Parte man gayud kana sa atong kalihukan dinhi sa kalibutan.
Sayod ko nga kining atong mga problemang gipanghambin karon, nga nagpabiling naghulga kanato, sigurado ako nga mahuman ra kini, dili man karon o ugma, basin sa sunod nga mga adlaw. Salig lang gayud kita sa Kahitas-an.
Dili kita kapuyon sa pagpahinumdom nga magpakabana kita kon gusto kitang makabalik sa normal nga kinabuhi.
Sa pagkakaron, mosakay na lang kita sa giingon ni kanhi Presidente Joseph Ejercito Estrada nga gipasikat ni Kuya Kim Atienza, “Ang buhay ay weather, weather lang.”
Gikumpara sa kahimtang sa panahon ang atong mga kinabuhi: anaay maayong tempo, ug anaay dautang mga gutlo.
Dili kita magpapildi sa bagyo sa kinabuhi. Atong hinumduman basta makigbisog lamang kita sa mga pagsulay, inig human sa bagyo mao ang hayag nga kalangitan nga puno sa bag-o o nagpangsidlak nga paglaum.
Kay weather, weather lamang ang tanan o mag-usab-usab ang dagan sa kinabuhi, inig hapak sa maong kusog nga hangin, mo-‘wave’ lang g’yud ‘ta sama sa kawayan ba — mapalid pero dili daling matumba. Ug ana-a may mabali o matumba, gamay ra.
Pasabot, mas daghang maayong butang o panghitabo sa kinabuhi kaysa mga makapahugno sa atong kalibutan. Kumbati lang!
Hinumdomi nga ang kinabuhi sama ra gayud sa panahon. Usob-usob.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
