Niabot sa P86M kantidad sa mga nagkadaiyang proyekto sa Bilar ang aprobado sa General Appropriations Act (GAA) 2023.
Nag-una niini ang Road Concreting sa Brgy. Bugang Sur ug Brgy. Cambigsi (P35M), P6M alang sa Brgy. Owac Multi-Purpose Building ug P10M sa pagbutang sa Solar Powered Water Pump nga ilang hangyo ngadto kang Congw. Alexie Tutor.
Aprobado usab ang gikan kang Sen. Jinggoy Estrada nga pagbutang sa Solar Street Light sa Poblacion-Yanaya-Owac-Rizal road nga kantidad P35M.
Sa laing bahin, gipahigayon pipila ka adlaw gikan karon ang Groundbreaking ug Capsule Laying Ceremony sa P170M nga 10.977 Rehabilitation sa Campagao-Dagohoy-Bonifacio-Cabacnitan road.
Ang maong proyekto ubos sa Philippine Rural Development Project kon diin 80% ang gikan sa World Bank samtang 10% ang sa Kagamhanang Probinsyal ug 10% sa Dept. of Agriculture.
Mapasalamaton si Bilar Mayor Norman “Tata” Palacio kang Gob. Aris Aumentado, DA-PRDP RPCO7 Deputy Project Dir. Engr. Cirilo Namoc ug sa Sangguniang Bayan nga gipangulohan ni Bise Mayor Ronnie Maligmat. (Kahlil Lester O. Camba)
