MAKADASIG kaayo ang mohimo ug mga laraw. Nindot mamalandong sa mga pamaagi nga pagasundon. Maayo ang atong mga panglantaw sa katumanan niini. Apan adunay kahigayonan nga makawang kita sa atong gihandom. Dili mahimong hingpit ang mga laraw ug plano sa kinabuhi kon wala ang atong katuyo-an. Ang katuyo-an maoy makagiya ngadto sa usa ka tumong. Ang tawo nga walay tumong mahisama sa batang nga nag-utaw-utaw sa kalawran. Kanunay na lamang nga ibanlas sa mga balud. Usahay anaa sa lapyahan, ug unya mahibalik sa usab sa kinapusoran sa kadagatan. Inighapak sa makusog nga hangin, dali ra kaayo kining mabalhin sa nahimutangan.
Walay mga laraw ug lakang nga matuman kon dili tin-aw ang katuyo-an. Gikinahanglan gayud kini aron makalampos. Magsugod kini damgo. Ang mga damgo makadasig ug mga panglangtaw. Mahatag kini ug kainit aron mahimong katumanan. Maka-aghat ug kasibot ug kaikag. Ang mga damgo maoy sinugdanan sa mga butang nga wala ug dili pa makita sa uban. Anaa pa kini sa handurawan sa tawo. Hangtod nga iya na kining sugdan pagbugtaw sa katumanan, mahulma na unya ang dagway ug molakra na ang kinatibuk-an niini, daghan na ang malingaw nga magpaabot sa sangpotanan. Aron matibway ang katumanan sa mga pangindahay, gikinahanglan ang tinuod nga katuyoan sa kinabuhi.
Ang kinabuhi gilangkob sa kagahapon, karon ug ugma. Puno kini sa kasinati-an ug kaagi, kahanas ug nakat-onan. Sama ra usab nga adunay paningkamot aron makab-ot ang gidamgo nga kaugmaon. Ang katumanan sa mga pangandoy mahimong moabot nga dili damhon, apan kasagaran maghimo gayud ug mga laraw ug lakang sa pag-angkon niini. Daghang mga pamaagi nga mahimong buhaton, apan aduna gayoy pag-antus, pagkugi ug paghago nga mahimong kaluha niini. Adunay daghang mga babag ug suliran nga ikahinagbo, gani mga pagsuway nga makaguba sa buylo ug pag-uswag. Luyo niining tanan, angay lamang gayud nga adunay tin-aw nga katuyo-an sa pagpakabuhi.
Ang katuyo-an maoy suga nga makalamdag sa hanap nga kaugmaon. Daghang higayon nga molandong ang mga pangandoy sa kinabuh. Sama ra usab nga kon walay init nga katuyo-an, masubhan kini. Makagabok ug makapapupog, makapa-awop ug makapawong. Inanay nga magakahinay hangtud nga maganoy ra usab sa kalimot. Ang katuyo-an maoy buhing ilhanan nga makasaksi sa mga pangindahay sa tawo. Kini makatukmod aron kanunay nga moirog paingon sa unahan. Ang tumong ug tuyo mamahimong baruganan. Ang baruganan usa ka bantayog sa lig-on nga kinaiya ug batasan sa tawo. Mobarog kini tungod sa tumong ug katuyo-an sa kinabuhi.
