SA group chat sa Fraternity diin ako nahisakop, usa namo ka brod ang mi-post og taas nga pahimangno kabahin sa pagka-way-hinungdan sa mga titulo sama sa Dr., Ph.D., Atty., etc. ug mitapos pag-ingon nga kining mga butanga, sama sa gahum, pagkasikat, ug bahandi, dili nato mabawon sa atong pagtaliwan ning kalibutana. Mismo ang brod nga nag-post niini may upat usab ka letra nga gitangag sa iyang ngalan kay siya usa man ka engineer.
Apan uyon kita sa iyang gi-post ciento-por-ciento. Gani, sa relihiyosong katilingban nga atong giapilan, ang Religious Society of Friends, gilagda nga guidili ang paggamit sa mga titulo, pagpahumot, pagsuot og mga makaanyag nga mga sinena, ug pagpasiatab sa mga alahas ug uban pang “borloloy”.
Hinuon, dili hugot ang akong pagsunod sa maong mga lagda. Ma-merfume man ko panagsa, labi nag suoton nakug balik ang sinena nga di pa buling. Di nuon ko tigsuot og bisan unsang alahas o borloloy ug ang akong cellphone 3310 gihapon; di gyud matintal ang mga snatcher. Apan midugang ko pagpasabut nga ang P.H.D. nga gitangag sa akong ngalan nangahulugan og PRAY, HOPE, DON’T WORRY segun sa tambag ni Padre Pio.
Moangkon pud ko nga maguol gihapon ko. Naguol ko sa mga nawad-ag trabaho nga matintal sa gi-awit ni Frank Sinatra, “to beg, steal or borrow”. Naguol ko sa mga kagisoonan nato sa militar nga dili makasabut kon unsay kalainan sa active nonviolence ug armed struggle. Basig mapatay nilag apil ang kaigsoonan tang Pilipinhon nga tiunayng nagsunod sa mando sa atong Ginoong Hesu Kristo pagsilbi sa mga kabus ug dinaug-daug. Hisgutan pa nato nag dugang puhon.
Apan tungod kay mag-ampo man ko, aduna koy paglaum. Molaum ko sa giingon ni Padre Pio nga P.H.D. Kini nagtukmod sa atong hisgutanan ngadto sa lain pang bantugang kalag nga alang kanako usa ka “living saint”. Si, Jorge Bergoglio, nga giilang Pope Francis. Sa labing una niyang pagsulti sa mga Roman Catholic faithful didto sa balcony sa Vatican, tulo ka butang ang gihatagan niyag importansya: Silent Prayer, Mercy ug Compassion. Ug hugot ang iyang adbokasiya niini sukad sa iyang pagka-Santo Papa.
Maoy hinungdan nga ako tiunayng nagsuporta sa iyang baruganan tali sa mga LGBT (lesbians, gays, bisexuals, transexuals). Wala ug dili siya pabor sa same-sex marriage. Dili mahitabo. Hinuon, ang iyang gipamulong subay gihapon sa iyang prinsipyo kabahin sa mercy ug compassion (kaluoy ug pag-amoma) ngadto sa mga kabus ug dinaugdaug. Kon kinahanglang hatagan sila sa legal nga katungod kabahin sa ilang mga kabtangan, buhaton ta kini, kon makatabang sa atong pagpadayag sa atong mercy ug compassion ngadto kanila. Pero same-sex marriage? Dili. Dili gyud sa Roman Catholic Church. Wa man gani nila tuguti ang mga women priests, same-sex marriage pa kaha? Mora kag nangandoy nga si kanhi-Presidente Duterte mangulo sa Confraternity of Our Lady of Lourdes. Imposible!
