SUPORTADO sa ikaduhang labing-labaw nga opisyal sa Bohol ang paghimong standard sa suhulan sa mga opisyal sa kabarangayan dili lang sa Bohol kon dili alang sa tibook Pilipinas.
Sumala pa ni bise-gobernador Dionisio Victor Balite nga dili sayon ang tabaho sa usa ka opsiyal sa barangay tungod kay sila ang anaa sa frontline services sa kagamhanan ilabi na panahon sa kalamidad o kalisdanan.
Nalooy si Balite sa mga brgy. officials tungod kay 24-oras ang ilang serbisyo ilabi na sa punong barangay nga anaa kaniya ang risgo nga trabaho.
Gusto sa bise-gobernador nga ang Punong Barangay, mga miyembro sa Sangguniang Barangay, ang Sangguniang Kabataan Chairperson, ang Barangay Secretary, ug ang Barangay Treasurer nga regular nga empleyado sa gobyerno ang makadawat kini og “fixed salaries”.
Gipasabot ni Balite nga ang Department of Budget and Management ang mohimo og klasipikasyon sa mga posisyon ug compensation scheme para sa mga barangay.
Kon maaprobahan sa Kongreso, ang Salary Grade I (P15,000) – alang kini sa mga barangay appointive officials ug ubang barangay personnel, Salary Grade II (P25,000) – alang sa barangay elective officials sa Sangguniang Kabataan ug Sangguniang Barangay, ug Salary Grade III (P35,000) – alang sa mga Punong Barangay.
Hinoon miingon si Balite nga dili madali ang maong lakang kay muagi pa kini sa makuti nga deliberasyon sa Kongreso ug kon asa mangita sa dugang pundo alang niini. (RTB)
