BISAN diing lehislatura, kon ang oposisyon wa ra ma-katunga sa mayoriya, mao kanay gitawag og absolutong mayoriya. Bisag pil-on pa sa kaduha ang oposisyon, dili gihapon mapildi ang mayoriya. Pananglitan, ang 80 batok sa 20, o 70 batok sa 30, ang 80 ug 70 absolutong mayoriya gayud.
Dili pa kana ang sitwasyon sa atong Sangguniang Panlalawigan (SP) karon. Apan kon basihan ang botasyon niadtong Martes, Deciembre 13, 2022 atul sa pag-aprobar sa 2023 Annual Budget sa atong Kagamhanang Probinsyal, adunay mga signos nga paingon na sa absolutong mayoriya ang pundok Abante Bol-anon.
Nganong nakasulti man ta niana? Tungod kay sa pag-approve sa maong budget ang botasyon mao kini:
Ang SP adunay 14 ka myembro lakip sila si: Bise Gubernador Victor Balite isip presiding officer; 3 ka SP Members sa Unang Distrito nga sila si Benjie Arcamo, Lucille Lagunay ug Aldner Damalerio; 3 ka SP Members sa Ikaduhang Distrito nga sila si Tommy Abapo, Jammy Villamor ug Mimi Boniel; ug 4 ka SP Members sa Ikatulong Distrito nga sila si Tita Baja, Greg Jala, Nathaniel Binlod ug Pediong Bonita.
Og tungod kay ang presiding officer dili man makabotar kon walay tabla, busa, 13 lamang ang unta mobotar. Apan sa wala pa ang botasyon, nananghid nang daan si SP Member Bonita nga molakaw kay adunay importanteng kalihukang atendihan sa iyang distrito.
Busa, 12 lamang ang mibotar. Nianang doce, 9 ang mibotar kuyog sa pundok Abante Bol-anon aron pag-approve sa budget, 1 ra ang misupak, ug 2 ra ang wala mobotar o mi-abstain.
Kon kana nga mga numero maoy basihan, ang 9, batok sa 3, usa na ka absolutong mayoriya o absolute majority.
Unsa man diay ang political affiliation sa mga SP Members? Mao kini:
Sa pundok Abante Bol-anon (7): Vice Gov. Balite, Baja, Lagunay, Jala, Abapo, Villamor ug Gementiza.
Sa pundok Padayon Bol-anon (5): Arcamo, Damalerio, Binlod, Bonita, ug Boniel.
Ang mga ex-officio SP Members: Cepedoza sa Liga, ug Bolos sa SK, isip mga opisyales sa barangay, walay mga partido.
Isip paryente ug kapamilya ni Congressman Edgar Chatto kinsa maoy founder sa pundok Padayon Bol-anon, si Bolos giihap nga habig sa maong pundok.
Si Cepedoza usab, base sa records sa SP ubos sa kasamtangang administrasyon, sagad mobotar kuyog sa pundok Abante Bol-anon. Tungod ba kaha kay siya taga Segundo Distrito man nga balwarte sa mga Aumentado, o tungod ba kaha kay siya usa man usab ka myembro sa Couples for Christ nga gipangulohan sa mga Balite? Siya ra mismo ang makasulti sa tukmang rason.
Apan nganong nahimong mang 9 ang 7 ra unta nga taga Abante Bol-anon?
Kana, tungod kay si Bonita mi-absent man; ug si Binlod ug Bolos mikuyog pagbotar sa naasoyng pundok. Gani, si Cepedoza mismo maoy principal sponsor sa maong Budget.
Sa sunod semana puhon atong hisgutan ang mahitungod sa posibleng unification o kahiusahan sa duha ka pundok.
