MOPAHIGAYON og higpit nga pagbantay ang kapolisan sa lalawigan sa pagmentinar sa kahapsay ug kalinaw niining panahon sa pagsaulog sa pasko ug bag-ong tuig.
Nagkanayonang Bohol Provincial Police Office (BPPO) nga nunot sa pag-isa sa full alert status mopahigayon sila og higpit nga pagbantay diha sa mga dapit nga daghan ang mga tawo nga magtapok.
Matud sa BPPO nga atol sa Misa de Gallo adunay mga polis nga idestino diha sa nagkadaiyang simbahan sa Bohol.
Lakip usab nga bantayan ang mga mall sa siyudad diin gialoman nga modagsa ang mga tawo nga mosulod sa mga mall ug higpit usab nga bantayan ang vital installations.
Sa laing bahin, si Bokal Tomas Abapo kinsa maoy pangulo sa komitiba sa kahapsay ug kalinaw sa Sangguiang Panlalawigan niawhag sa katawhang Bol-anon nga mag-amping kanunay.
Matud ni Abapo nga niining pagsaulog sa pasko kinahanglang magbantay kanunay diin kadtong adunay mga gipahimutang nga Christmas decors ug Christmas lights.
Ang Christmas lights angaya’ng susihon ang connections lakip na ang appliances tungod kay mao kini kasagaran nga hinungdan sa sunog, sigon sa bokal. (RTB)
