ANG mga kalalakihan, labi na kung minyo, tingale nagtuo nga ang tentasyon mao kanang babayeng seksi ug gwapa nga dili nila asawa unya nindot kaayog pahiyum. Dili.
Ang tentasyon ania sa atong kaugalingon. Tingale kanang tawo nga atong makita o sitwasyon nga atong masinati posibleng adunay relasyon sa atong mahimong reaksyon. Apan kon wala kanato ang atensyon sa maong tawo o sitwasyon, walay mahimong tentasyon.
Sa atong pag-ampo moingon kita, “Ug dili mo kami itugyan sa panulay, hinunoa luwasa kami sa dautan”. Sa akong pagkabata sagad nahung madunggan ahung lola sa kusina, inig-abug niya sa iring moingog, “Hoy panuway”. Nagdaku ko nga nagtuo nga ang panuway, evil.
Diha na ko nakaamgo sa daku na ko, dihang akong gi-analisar og maayo ang maong pulong, nga ang panuway o panulay gikan diay sa pulong nga sulay o pagsulay. Test. Dili, evil.
Nakahunahuna kita niini karong panahona tungod kay aduna kitay mga nasinati karong bag-o diin gisulayan ang atong pasensya.
Matag higayon nga adunay bag-ong administrasyon tungod sa resulta sa eleksyon, duna man gyuy mga kausaban nga mahitabo. Matag lider aduna may iyang kaugalingong panglantaw ug pamaagi.
Sa dihang batan-on pa kita, mubo ra atong pasensya. Apan karon nga senior citizen na kita, atong naamguhan nga tinuod gyud diay ang giingon sa mga katigulangan nga ang edad ug taas nga kasinatian, makapakalma gayud sa tawo kon iya kining hinuklogan.
Mao kini ang konteksto diin kita nakahinuklog kon unsa ang tentasyon; kon unsa ang panulay. Sa atong kaugalingong kahuyang matintal kita sa pag-ingon nga kining mga hawud-hawuron nga tawo usa ka tentasyon. Makaingon kita nga tungod sa iyang paghawud-hawud ang mga tawong nagpalibut kaniya, lakip kita, matintal, dili lamang sa pagpanglibak, apil na ang paghunahuna og mga negatibong hunahuna. Dili maayo.
Apan kon atong tugkaron, matintal lamang kita, kon ania na kanato mismo ang maong matang sa mga negatibong hunahuna. Kay kon dili kini nato hatagan sa atensyon, walay mahimong tentasyon. Kay kita huyang man usab, atong iampo ang atong kaugalingon, ug lakip ang kunohay mga tentasyon. God bless you, Brod!
