GIBUTYAG ni Duero Mayor Al C. Taculad nga ilusad na karong umaabot Nobyembre 25, 2022 ang JamzTiguls nga iyang “personal initiative” arun mapadayun ang pagtabang sa katawhan ilabi na ang mga Senior Citizens.
Mao kini ang iyang pamahayag atol sa eksklusibong pakighinabi sa media.
Kon walay mga kakulian, pagahimuon kini kaduha sa usa ka buwan nga sukdan karong Nobyembre 22.
Maglakip kini sa mga raffles nga nagkalain-lain ang mga cash prizes ug sa Nobyembre 28, 2022 mao ang Launching sa Christmas Decors.
Ang Duero dunay 21 ka mga barangay nga gialagaran karon ni Mayor Taculad ug ang Sangguniang Bayan nga gipangulohan ni Bise Mayor Hernes Bajao.
Dugang pa sa mayor nga dili angay mahunong ang pagtabang ilabi na nga naa pa sa panahon sa pandemya; ginagmay man kini apan kanunay.
Ang Duero pagatawgon nga Home of Fruits, Veggies and Spices matud pa niya mao nga “for implementation” na ang Food Park nga duol sa Duero Gymnasium samtang “for Bidding” ang BBQ Stalls section nga naa mahimutang sa kilid sa Merkado Publiko.
Walay labot pa niini ang pagpanindot nga pagahimuon sa ilang merkado sanglit “dilapidated” na kini suma pa sa mga naunang pamahayag sa mayor.
Ang sector sa Food Tourism maoy usa sa mga ugmaron sa ilang lungsod sanglit sa mga nangaging panahon nahimo lamang nga labyanan ang Duero.
Sa laing bahin, aprobado na ang budget alang sa Alteration nga pagahimuon sa Balay Lungsod. (Kahlil Lester O. Camba)
