PUNO sa kalipay ug kahinangop ang bati-on sa mga naglangkob sa usa ka pundok nga magsaulog ug Balik-panagtapok. Ang Balik-panagtapok (Reunion) maoy kalihokan diin ang kauban sa usa ka klase (Batch/Class) nga nagdungan ug katapos sa pagtungha magkita-kita, magkatagbo ug magkahi-usa pagbalik sa gitakdang panahon. Dili lamang kadtong nakatapos sa elementary ug sekondarya, apil usab kadtong nakahuman ug kurso sa kolehiyo.. Maghimo usab ug reunion ang mga magkauban sa usa ka seminar, forum ug summit. Atol sa panagtapok ug balik-panagtapok, ang mga kaubanan maghisgot sa mga kanhi-ay ug kagahapon nga halandumon ug makasaysayanon.
Kasagaran mga kauban gayud sa Batch/Class ang maghimo ug Reunion agad sa gikasabotan nga pitsa ug panahon ilabi na ang mga ka batch sa high school. Kay matud pa, daghan ug mga kasinati-an ang mga kabataan panahon sa ilang pagtungha sa sekondarya. Niini usab nga panahona nga ang mga bata aduna nay moangay ug gi-angayan. Mga crush ug puppy love, matud pa. Gani aduna nay nagkahigugma-ay panahon sa high school. Panahon sa Reunion, dili kalikayan nga maghinubay ang mga kaubanan sa ilang mga kanhi kalihokan ug kaagi. Mahisgotan usab ang ilang mga magtutudlo, lisod nga mga subjects ilabi na ang Geometry, Algebra, Chemistry ug Physics.
Basta daghan kaayong mga hisgotanan ug mga topics. Malakbitan usab ang mga kalisod ug kasakit nga naagi-an ug nahi-agoman sa pagtungha ug pagpangitag trabaho. Ang mga Balik-panagtapok kasagaran gihimo paglabay sa napulo ka tuig human nakagradwet sa high school. Ang uban magkasabot nga matag lima ka tuig human sa unang Reunion. Kadaghanan sa unang panagtapok gihimo paglabay sa napulo ka tuig tungod kay niining panahona nakatapos na sa pagtugha ang mga kaubanan sa Batch, aduna nay trabaho ug dili ba kaha nakapundar na ug negosyo. Hinu-on dili pa kaayo daghan ang gusto nga moapil sa unang Reunion. Adunay Ruby, Silver, Golden ug Diamond Anniversary Reunions.
Apan dili gayud tanan ang makaapil ug moapil sa Balik-panagtapok. Kasagaran nga babag mao ang kakabus ug kalisod nga ikaulaw sa mga kauban sa Batch. Dili tanan ang nakalampos, gani adunay daghan nga walay trabaho. Mas nindot ug mas maayo nga moapil niini nga kalihokan. Pinaagi niini, makapasalamat kita nga nakatambong. Makaduaw usab sa atong Alma Mater, makalibot ug makahinumdum sa mga kaagi. Makahimamat sa atong mga classmates ug higala nga dugay nang wala igkita. Magkantiway, mangatawa ug manghilak. Dili matukib ang atong mga pagbati, ilabi na alang niadtong nangawala na. Maglingaw. Mubo ra ang kinabuhi. Congrats BHS Class ’72 Golden Reunion.
