MATUD sa akong suod nga higalang doktor nga nagtuon sa alternatibong medicina didto sa Germany, ang Corona Virus gipalabian lang pagpaukyab sa mga nagkalain-laing pwersang naghari ning kalibutana, sama sa mga dagkung negosyante sa tambal, mga gamhanang gobyerno o superpowers nga gustong mokunhod ang populasyon sa kalibutan ug uban pang mga interes nga sukwahi sa kaayohan ug tawhanong katungod sa katawhan sa tibuok kalibutan. Miingon siya nga dili kita angayang mataranta, apan dili sab hinuon angayang magpasagad o mokompyansa.
Ari ta’s maayong balita. Ang usa sa atong mga higalang tigpasiugda sa mga kalambuan sa kulturang Bol-anon mi-asoy nga ang iyang igsoon kaduha na ma-stroke sa sakit nga hypertension ug ubang komplikasyon. Karong bag-o, sa dihang gi-atake na usab ang iyang igsoon, usa ka higala niya ang mitambag nga dad-on ang iyang igsoon sa usa ka doctor nga igsoon ni kanhi Secretary of Health Jaime Galvez Tan, si Jake Tan. Tuod, gidala niya ang iyang igsoon, og nahikurat sila sa resulta! Karon, lakip na siya mismo migamit na usab sa sistema sa alternatibong pagpanambal nga nakasalbar sa iyang igsoon.
Kining ato, dili pag-advertize kang Jake Tan ug sa iyang pagpanambal. Kini agi’g serbisyo niadtong atong kaigsoonan nga gibati nag pagka-desperado usahay tungod sa kamahal sa tambal alang sa ilang sakit, o dili ba kaha, wala maayo sa naandan nilang mga tambal. Ang sistema sa medisinang atong gihisgutan gitawag og Homeopathy ug Anthroposophical Medicine. Kini, ato usab nga matuki pinaagi sa Internet ug bisan sa pipila ka doktor dinhi sa ato nga migamit niining maong mga pamaagi sama nila ni Dr. Marieto Ibarra ug Dr. Edna Sasing-Lao. Kasagaran, hisgutan usab kining maong mga pamaagi sa mga istasyon sa Discovery Channel ug Arirang diha sa telebisyon tungod kay ang mga alternatibong pamaagi, aprobado ug sikat na man didto sa ubang kanasuran.
Karong semanaha, atong gihandum niadtong Noviembre Uno ang Todos Los Santos kon Adlaw sa mga Santos. Gisundan kini sa adlaw sa atong mga minahal nga mitaliwan na. Nakapahinumdum kini kanato sa panultihon nga naga-ingon: “Ang kinabuhi usa ka panaw gikan sa Pasko paingon sa Pagkabanhaw. Nga sa ato pa, ang atong birthday maoy isip pasko sa atong kinabuhi, ug ang atong kamatayon usab maoy ilhanan nga kita puhon mabanhaw na uban sa atong Ginoong Hesu Kristo”. Kana, kon atong gisunod ang Iyang mga pagtulun-an. #AmpoPaMore!
Hangtud sa sunod guwa, Sano ug Sana!
