PORMAL nang milingkod isip Provincial Commander sa Bohol Police Provincial Office si Police Col. Lorenzo A. Batuan kaniadtong Biyernes, Oktubre 28, 2022.
Human gipahigayon ang turn-over ceremony didto sa PRO-7 Regional Headquarters sa dakbayan sa Sugbo diin si PBGen. Roderick Augustus Alba, ang Director sa PRO-7 maoy nanguna sa “turnover of office ceremony”.
Mitambong sa naasoy nga kalihukan si Police Lt. Col. George Acol Vale ang deputy provincial director for administration sa BPPO.
Si Col. Batuan maoy nihulip ni Col. Osmundo Salibo nga muretiro na sa PNP sa umaabot nga Nobyembre 27, 2022.
Si Col. Batuan usa ka Bol-anon diin personal nga gipili ni Governor Aris Aumentado nga maoy mamahimong Provincial Director sa Bohol Police Provincial Office.
Nasayran ning pamantalaan nga nadawat sa BPPO ang kamanduan sa pagbag-o sa liderato niadtong Miyerkules, Oktubre 26 gikan kang Police Regional Office (PRO) 7 director Brig. Si Gen. Roderick Alba.
Miyembro siya sa Philippine National Police Academy Class of 2000 diin siya maoy deputy director for administration sa Cebu City Police Office.
Si Salibo nga gihulipan ni Batuan nahimong hepe sa kapolisan sa Bohol sukad niadtong Abril 2021. (RTB)
