PORMAL nga gianunsyo ni Gobernador Erico Aristotle Aumentado ang pagtahan sa kagamhanan sa usa ka taas og ranggo nga opisyal sa New People’s Army Bohol Party Committee (NPA-BPK) didto sa ikaduhang tigum sa Provincial Peace and Order Council (PPOC) didto sa Ceremonial Hall sa Kapitolyo, Oktubre 27.
Si Eliazar Nabas nga taga Rizal Batuan, nagsugod paghabig sa armadong kalihukan diha nga 16 anyos pa siya niadtong 1992 ug hinayhinay nga mingsaka sa pwesto hangtud natahasan na sa mga dinagkong kampanya sama sa pagpangulo sa Semi Legal Front sa mga rebelde, diha sa mga kalungsuran sa Bilar, Batuan ug Sevilla.
Human sa pipila ka tuig lakip na ang didto siya maglihok sa Negros ug sa Sugbo human niadtong 2011 kanus-a gideklara ang Bohol nga insurgency-free, nahibalik lamang sa Bohol dihang minglugak na usab ang kampanya sa kasundalohan ug mga miaging tinugyanan sa kagamhanan niadtong 2018.
Bisan pa og gikataho na nga nabungkag na human sa 2011, nagpabiling naglaroylaroy ang pipila ka sakop sa armadong pundok aron unta ibalik ang ilang paghupot sa mga katawhan
Nailhan usab nga kanhi Deputy Secretary sa Bohol Party Committee sa NPA, si Nabas minghupot sa dungog sa yang pagpangulo sa daghanang engkwentro tali sa kanhi 12 infantry Batallion ug sa 47IB human sa 2018.
Nailhan sa daghang alias sama sa Yokyok, Delo, Jinggoy, Nonoy ug tingali daghan pa depende kon hain silang lugara mag-operate, Si Nabas, kinsa igsoon sa taas nga opisyal usab sa mga NPA nga napuhag didto sa Cabacnitan Bilar niadtong miaging mga tuig, nagsugod og pagpalubad sa iyang pagtahan niadtong Septembre 14, 2022, segun pa ni Gob Aumentado.
Human niadto, pinaagi sa paningkamut nila ni Batuan mayor Antonino Jumawid kinsa nakigsabut usab dayun sa gobernador, gikuha sa kagamhanan si Nabas alang sa gilagda nga custodial briefing niini sa mga tinugyanan, hangtud nga pormal na nga nasabutan ang iyang pagsurrender Septembre 30.
Sa pagtahan ni Nabas, kinsa may gibiyaang pamilya ug mga anak nga anaa na sa 18, 15 ug 14, mipadayag sa kalipay si Gob Aumentado kay nabati na sa mga naa sa kalihukan ang kaseryoso sa kagamhanan sa pagpatunhay sa kahapsay ug kalinaw.
Today, under my Administration, we mean business in bringing our services and programs and projects of government to the people, matud ni Aumentado.
Sa pagtahan, gihangyo ni Aumentado ang mga tinugyanan sa joint AFP PNP Intelligence Committee aron sugdan dayon ang joint agreements on safety and immunity gurarantees (JASIG) alang sa seguridad ni Navas ug ikakompirmar na siya nga matuod nga rebelde, magbag-o na.
Kini aron makakuha si Nabas sa dugang pa hinabang nga tanyag sa Enhanced Comprehensive Local Integration Program sama nga gihangyo niya ang kapolisan ug kasundalohan nga hatagan og dyutay nga panahon si Nabas nga ikauban pa ang iyang nabiyaang banay sa dili pa ikapagawas ang mga warrants sa iyang mga kaso kaniadto.
Ang pagtahan ni Nabas maoy labing dako pa nga nakab-ot nga kadaugan sa kampanya sa Ending Local Communist Armed Conflict dinhi sa Bohol human sa unang 100 ka adlaw sa panerbisyo ni Aumentado. (RAHC/PIA-7/Bohol)
