ATUL niining panahon sa peligro tungod sa hulga sa Corona Virus, ang atong kultura sa pagkumusta sa kamot tali sa atong mga higala, mga dinapit ug kaila, dili na tingale luwas ug kinahanglang undangon una. Bisan giila kitang mga Bol-anon sa atong pagka-maabi-abihon, ang atong kaluwasan mao tingale ang angayang ipatigbabaw.
Ang mga Hindu adunay gitawag og, Namaste. Sama sa atong buhaton kanang gikan mokalawat ug panahon sa pag-ampo, tipuon atong duha ka pad og ibutang atubangan sa kasingkasing, unya moingon silag, “Namaste”, nga sa ato pa, “Miyukbo ako sa balaang ispiritu nga anaa kanimo”. Kadtong mga nakaadto usab sa Japan, o ba kaha, nasuhito sa kultura sa mga Hapon, nasayud nga ang mga Hapon magsigeg yukbo sa usag-usa matag higayon nga sila magkita o magtagbo bisan asa. Bisan gani ang mga nagmaneho sa mga sakyanan mohunong ug moyukbo sa usag-usa diha sa mga intersection sa kalsada. Di man lagi pud sila ma-traffic.
Matag higayon nga ang mga Muslim magtagbo, moingon usab silag “Assalamualaikum”, nga sa ato pa, “Ang kalinaw sa Dios (o ni Allah) maanaa kanimo”. Nganong di man ta kahimo sa ingon? Atong tipuon atong mga kamot atubangan sa atong kasingkasing, dayong ingon, “Ang Ginoo Maanaa Kanimo” (A.G.M.K.), ug tubagon usab og, “Maanaa Usab Kanimo” (M.U.K.)? Di ba piskay? Nindot? Mas luwas pa kana kaysa magkumustahay ta ug mag-inambitay sa virus. Pastilan!
Matud pa sa mga pagtuon sa Anthroposophic Medicine: “Ang sikolohikal ug emosyonal nga aspeto sa atong kinabuhi dakug epekto sa atong panglawas. Matag higayon nga kita malipayon o magul-anon, may simpatiya o antipatiko, kini naghulagway sa atong pagkontrolar sa atong pagbati ug kinahiladman.
“Segun sa mga modernong pagtuon, sama sa anthroposophic medicine, ang importansya sa atong panghunahuna ug pagbati adunay direktang impluwensya sa atong pagkaayo gikan sa sakit o pagkasakit ba kaha hinuon. Pananglitan, ang stress, kasakit ug kaguol mahimong moresulta sa atong kahuyang pagsagubang sa mga virus, bacteria ug pagka-angol”.
Dayag na lang, ang tim-os nga pag-ampo makapalig-on gayud sa atong pagtuo ug makawagtang sa kahadlok. Inubanan sa atong pag-amping, dili kita mahisugamak sa kadaut. #AmpougAmpingPaMore #AGMK #MUK
