ANG Sangguniang Panlungsod sa Tagbilaran karong bag-o nipasar ug miaprobar sa ikatulo ug katapusang pagbasa sa ordinansa nga nagpahamtang og regulatory fee alang sa operasyon sa cellular towers sa dakbayan.
Matod ni Konsehal Fausto Budlong nga maoy nagsulat sa maong lakang, ang ordinansa giaprobahan sa Konseho atol sa regular session nga walay misupak.
Ang ordinansa nagkinahanglan og tinuig nga bayronon nga P25,000 sa matag cell sites sa dakbayan.
Matod ni Budlong nga mas ubos ang gipahamtang nga bayronon kay sa orihinal nga gisugyot nga P50,000, diin gisupak sa higanteng telekomunikasyon nga Smart Communications, Inc.
“Ga committee meeting mi with the City Legal Office and City Treasurer’s Office, atong gi-discuss og balik kay nakakuha man ta og letter sa Smart nga mitaas ra kuno ang gi impose nga P50,000,” matod ni Budlong.
Sa kinatibuk-an nga 62 ka cell sites sa dakbayan, ang koleksyon sa mga bayronon gipaabot nga makamugna og kapin sa P1.5 milyones matag tuig alang sa dakbayan ug pipila ka barangay.
Matod ni Budlong, ang barangay diin nahimutang ang cell site makadawat og bahin nga 20 porsiyento sa bayad sa matag tore.
Sa laing bahin, gimugna usab sa samang lakang ang City Telecommunications Regulatory Committee nga maoy modumala sa imbestigasyon, pagmonitor, ug pag-inspeksyon sa mga cell sites sa dakbayan.
Ang komitiba pangunahan sa mayor. Ang matag barangay uban sa koordinasyon sa Tagbilaran City Primary Care Facility gitahasan usab sa paghimo og information drive sa kaluwasan sa mga cell sites nga gipabarog sa mga barangay. (RTB)
