DAKU kaayo ang atong pagpasalamat sa kahigayonan nga gihatagan ug luna ang atong lindog dinhi niining pamantalaan. Dili matukib ang gibati natong kalipay nga makapaambit sa mga hunahuna ug panahom ngadto sa mga suking mambabasa. Atong panghinaut nga pinaagi niini makahatag kitag lingaw ug kalipay ug usab anaa unta sa maayong panglawas ug panghunahuna ang tanan nga makabasa niining atong sinuwat. Atong paningkamotan nga pinaagi niining pagpanuwat, mahatagan natog katin-awan ug pagpasabot ang init ug nagbagang mga isyo ug mga hisgotanan.
Mihuyang ang kandtidad sa peso batok sa dolyar. Dili lamang kwarta sa Pilipinas ang naapektohan sa pagkalig-on sa dolyar kon dili halos tanang mga nasud sa tibuok kalibotan. Kini nahitabo human gipasakaan sa Tinipong Bansa sa Amerika ang interest rate sa ilang dolyar. Nakapa-aghat kini sa kusog nga panginahanglan sa dolyar sa patigayon sulod ug gawas sa Amerika. Ang mga magpapatigayon nagtigum ug dolyar aron gamiton sa pagpamalit sa halos tanang produkto sa patigayon. Sa ingon niini nga nagpanghitabo naratsada ang kalihokan sa pamatigayon sa tibuok kalibotan.
Ang bunga sa pagkalig-on sa dolyar mao ang pagsaka sa presyo sa nagaunang palaliton. Sama ra usab nga maangin ang kinatibuk-ang presyo sa kamerkadohan. Tungod kay dolyar ang kantidad sa mga palitonon gikan sa gawas, motaas ang mabayran sa mga pinalit gikan sa ubang mga nasud. Mosangpot kini sa pagsaka sa puhunan sa mga ibaligya. Ang negosyo kinahanglan nga mokita. Ang pagsaka sa puhunan adto ipatong sa kantidad sa mga baligya. Ang mga pumapalit maoy magbago sa kinatibuk-an. Walay mahal kon mga negosyante na ang hisgotan. Padayon lang gihapon sa ilang kalihokan.
Gatuyatuya ang kantidad sa mga produktong petrolyo. Nakapadugang kini sa gisagubang sa mga katawhan. Dali ra kaayo ang epekto sa pagtaas sa gasolina, diesel ug kerosene. Apil na usab ang presyo sa LPG. Tungod kay giganit matag adlaw, walay mahimo ang pumapalit. Bayad sa walay kusmod. Ang ubang kalihokan sa patigayon magpatakod usab sa pagtaas sa presyo. Mosaka ang bayranan sa pletehan. Magpadugang ug sweldo ang mga mamumuo. Maapektohan usab ang pagtumod sa mga abot gikan sa umahan. Ubos ang palit didto sa tinubdan bisan pa nga gibaligya kini ug mahal sa tiyanggihan.
