ANG “Task Force Isda” nga gimugna ni Gobernador Aris Aumentado aron matubag ang kamahal sa presyo isda sa Bohol musugod karong Oktubre sa pagpatuman sa mga lakang nga magpaus-ossa taas nga presyo sa isda sa probinsiya.
Sumala pa ni Provincial Administrator Aster Caberte, human sa tigom sa task force karong bag-o nga dunay na silay mga datos ug impormasyon nga makatabang sa gobyerno sa paghimo og mga polisiya nga makapaus-os gyud sa presyo sa isda.
Gipanguluhan ang task force sa executive assistant on agriculture sa probinsiya nga si Ricardo Oblena, nangayo usab og tabang sa nagkalain-laing ahensya ug local government units aron makatabang sa pagpatuman sa mga pending nga lakang.
Apil sa tigum ang League of Municipalities sa Bohol pinaagi sa pangulo niini nga si Buenavista Mayor Duallo tungod kay importanti sila sa implementasyon labina ang mga coastal towns.
Gilusad sa kapitolyo ang Task Force Isda sayo ning buwana isip tubag sa awhag sa publiko sa pagsulbad sa dugay nang problema sa mga mahalon nga isda.
Si Caberte miingon nga nakakuha sila og dakong suporta gikan sa publiko ug mga stakeholders sa industriya sa ilang mga paningkamot.
Namatikdan usab niya ang panginahanglan sa pagpasar sa balaod nga makapalig-on pa sa kampanya sa gobyerno diin giangkon usab ni Caberte nga dili sayon ang pagsulbad sa isyu.
Siya miingon nga lisud ang pagbag-o sa usa ka butang nga dugay na nga gilakip isip bahin sa lokal nga dinamika sa ekonomiya. (RTB)
