MAKAINGON KO nga si Mr. Emmanuel “Willy” Bongcac Ramasola ang “modern-day” [Jose] Rizal dinhi sa lalawigang Bol-anon.
Daghang nibilib ni Sir Willy sa iyang krusada batok mga kurakot nga opisyales o inilang personalidad dinhi sa Bohol. Ug usa ko sa nidayeg usab sa iyang ‘bayanihong lakang’.
Ana-a ang baruganan, kaisog ug sinseridad sa iyang ‘commitment’ sa katawhang Bol-anon — isulod sa prisohan ang mga kawatan sa gobyerno dinhi.
Kahibawo kita nga dili sayon ang iyang gibuhat. Gawas nga dili kalikayang mabutang sa peligro ang iyang kinabuhi, oras ug resources (pananglitan anaay mokiha niya) usab ang iyang puhunan aron iyang mapaabot sa publiko ang iyang gustong ipahibawo ilabina may kalabutan ang katawhan niini.
Ang nakabilib, dokumentado o anaa siyay bitbit nga mga ebidensya nga makaprobar sa iyang mga gialegar batok sa mga gamhanan ug impluwensyadong politiko ug indibidwal.
Matud pa niya, “he is only armed with the truth”.
Busy nga tawo si Ramasola kay usa man ka negosyante nga tua nakabase sa Makati City, apan anak sa Bohol.
Apan niingon siya nga kanunay na siyang mag-ulian dinhi sa Bohol kay usa man siya sa mga sakop sa Board of Consultants sa Office of Governance Accountability and Review kun OGAR sa administrasyong Aris-Victor.
Bisan kon buot sabton puwede na niyang biyaan ang mga suliran karon sa pang-gobyerno sa Bohol ilabina sa Kapitolyo, kay dili man siya politiko, wala nahilayo ang iyang pagbati dinhi ilabina sa kaigsoonang Bol-anon.
Daghan kita’g mga kaila sa social media nga mga kuwartahan ug gamhanan apan dili sama niya nga nanginlabot ug nagpakabana sa mga isyu karon sa Bohol, ilabina gayud ang korapsyon.
Sa nauna nakong lindog kabahin sa iyang krusada, niingon siya nga iya kining gihimo tungod kay naluoy siya sa mga Bol-anon ilabina kadtong mga kabus ug daghang naglisod, unya ang uban kaugalingong interes ra ang gipakadak-an, ilabina ang iyang giatakeng mga personalidad sa politika, matud pa niya.
In case nga nakalimot mo, mao ni iyang tubag sa akong interbyu kaniya sa Messenger:
“Unsay nakapa dasig nako ug gukod anang mga corrupt na opisyales ug pang expose sa mga anomalya sa atong gobyerno?”
“Naa man gud ta karon sa crisis. Daghang galisod sa financial karon. Mga tao galisod mangitag trabaho. Ang naay trabaho galisod paigo sa ilang mga gamay na sweldo. Ug daghang mga negosyo na galisod karon.”
“Busa ang atong gobyerno ug ang atong mga opisyales dapat magdaginot para dili mag waldas waldas ug kwarta sa katawhan.
Ug kung naa may angay gyud gastuhan na project or pamaliton then dapat naa sa tarong na pamaagi meaning dapat sakto ang presyo ug quality.”
“Or, kung sa project implementation man gani dapat sakto ang pagtrabaho ug dapat mahuman gyud siya on time according sa schedule para mapahimuslan sa mga katawhan ang ilang mga gipang bayad na buwis na gikan sa ilang mga hinaguan.”
“Mao ni akong gusto matampo nako sa Bohol o bisag sa atong nasod ba. Na makatabang ta magpasiguro na sakto ang pamalakad sa atong mga elected ug appointed na mga public servants.”
“Salamat.”
Kon mo-follow mo sa iyang Facebook account, Willy Ramasola, inyong mabasa ang iyang mga posts kabahin sa korapsyon sa mga inilang dagkong tawo dinhi sa Bohol.
Ug inyo usab mabasa nga daghan ang nisuporta niya.
Gani sa pormal nga paglusad sa OGAR, mismo si kanhi Cabinet Secretary ug karon OGAR Chairman Jun Evasco, Jr. niingon nga ang kadaugan ni karon Gob. Aris Aumentado, 30 porsyento kuno ato kang Ramasola.
Ug niingon usab ang maong social media influencer nga ang iyang krusada batok korapsyon, libre. Kay kini alang man sa mga Bol-anon.
Ako, daghan ko og kaila nga mga politiko, anaay kuwarta nga ikasukol kon gustuhon nilang ibulgar ang mga anomalosong transaksyon sa ilang mga kaubang politiko, apan talawan. Sirado ang baba. Mahadlok og kasuhan.
Kon ako siguro ang naa sa ilang posisyon: kasamtangang naglingkod isip pinili sa katawhan ug anaay salapi, dili ko mahadlok nga ibulgar ang hugaw nga binuhatan sa mga politiko, ilabina kon sobra na ang ka-abusado ug hilig manamak sa mga tawhanong katungod ilabina sa mga pobre.
Karong panahona nga mas nigrabe ang korapsyon matud pa ni kanhi Senate President ug karon Chief Presidential Legal Counsel Atty. Juan Ponce Enrile, nagkinahanglan kita og daghang Willy Ramasola dinhi sa Bohol karong panahona.
Na-probar ni Willy Ramasola nga siya gipaluyohan sa katawhang Bol-anon ug buhing-saksi niana ang pagkalagpot ni Art Yap sa iyang puwesto, kinsa naputos sa daghang isyu sa korapsyon sa Kapitolyo ilawom sa iyang pamunoan.
Akong pagsaludo usab ni kanhi 3-termer Tagbilaran City Mayor Atty. Dan Neri Lim nga nakigbisog usab alang sa interes sa katawhang Bol-anon.
Ni Sir Ramasola, God bless you sir and more power. Amping kanunay.
Abante Bohol! Abante Bol-anon!
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
