INAY mopalit og modern nga van ang lungsod sa Loay, ila na lang hinuon kining ipalit og dugang jeepneys aron makaabag sa ilang Libreng Sakay.
Kini maoy gitug-an ni Mayor ug abogado Hilario Ayuban, sa us aka pagpakighinabi dili pa lamang dugay.
Ato kini nga gibuhat aron makahatag og suporta ang lungsod sa mga estudyante nga naningkamo nga makaeskwela ug makahimo og pag-asenso sa kinabuhi. Dinhi, mobenepisyo usab ang lungsod pohon, saysay ni mayor Ayuban.
Kahinumduman nga ang Loay, may daghanan nga mga estudyante nga tua magtungha sa mga eskwelahan sa Lila, Loay, Alburquerque ug sa Tagbilaran.
Ug sa kakuwang sa mga sakyanan nga masakyan sa mga taga didto, daghan usab nga mga estudyante nga malangan sa pag-uli, gawas pa sa suliran sa pletehan.
Tungod niini, mihukom ang lungsod nga mopalit og mga jeepneys nga may kapasidad sa 25 ka estudyante nga pasahero sa matag byahe.
Segun sa talaan sa lungsod, may dul-an sila sa 500 ka mga estudyante nga nang-eskwela sa silingang lungsod sa Lila, ug dul-an sa libo lka estudyante nga nagkolehiyo, nag senior high ug nag high school sa syudad sa Tagbilaran, mga 28 kilometros ang kalay-on.
Matud pa sa usa ka ginikanan, wala nay byahe paingon sa Loay gikan sa syudad kon ma alas 8:00 na sa gabii, mao nga maningkamot na lamang intawon ang mga estudyante og pangilog aron lamang makasakay pauli.
Daghan pa usab sila og mga estudyante nga tua magtungha sa Camayaan High School sa Loboc, laing ruta nga menos ang sakyanan ilabi na kon mahapon ngadto sa gabii.
Kasamtangan nga may 4 ka mga jeepnesy naang lungsod, ug ilang gihimo nga prayoridad sa mga byahe niini mao ang sayong buntag ngadto sa Tagbilaran ug Lila, ug ang sa gabii, gikan sa Tagbilaran.
Bisan pa sa libreng sakay, kuwang pa gihapon nga mahipos ang mga estudyante nga taga lungsod, hinungdan nga inay van, ipalit na lang kini og dugang duh aka jeepneys, matud sa mayor.
Gawas pa niini, laing duha na usab ka jeepneys nga gilaraw nila nga paliton sa sunod tuig, ug matud pa, dili moundang ang lungsod hangtud nga makapalit og 10 ka mga sakyanan alang sa libreng serbisyo, dugang sa mayor.
Apan karon nga kuwang pa gihapon ang ilang mga sakyanan, awhag sa mayor ngadto sa mga tinun-an nga dili pa makasakay, nga masensyahan sa lang una kay dili pa gyud maatul og serbisyo ang tanan.
Nunot niini, malipayon na ang mga estudyante nga nagtambong sa gibuksang face to face classes kay may masaligan na sila nga kasakyan para makauli, gikan sa eskwelahan. (RAHC/PIA-7/Bohol)
