NAHIMO’NG providential alang sa Sangguniang Panlalawigan ang katukoran sa Office of Governance, Accountability and Review (OGAR) sa Kapitolyo, kini maoy gipalubad ni Bise Gobernador Dionisio Victor Balite, didto sa press conference nga gipatawag agi og paglusad sa buhatan.
Didto sa Press Conference nga nagpa-ila-ila sa mga Board of Consultants sa sa OGAR, gipasabut ni Gobernador Erico Aristotle Aumentado nga ang katukuran sa OGAR, dala sa pagtuman sa iyang gisaad niadtong panahon sa kampanya: limpyo nga pangagamhanan ug unahon ang mga Bol-anon.
Ang Board of Consultant sa OGAR mao sila Justice Gabriel Ingles, kanhi provincial prosecutor Macario Delusa, kanhi huwis Suceso Arcamo, kanhi mayor Dan Lim, negosyante nga kang kinsang adbokasya mao ang pagpadayag sa mga hiwi sa kagamhanan Emmanuel Willy Ramasola.
Gawas sa Board of Consultants, ang OGAR pangulohan ni kanhi Cabinet Secretary Leoncio Evasco, ug ang secretariat niini mao si Atty Handel Lagunay kauban sa 6 ka mga abogado nga pangulohan usab ni Atty Neil Ochoco.
Sa iyang kabahin, gibutyag ni Bise Gobernador Balite nga ang OGAR maoy nagsalbar sa Komitiba sa Sanggunian nga sarang maoy kina-ingnan usab sa ilang kapildihan.
Matud ni Balite, ang OGAR susama og trabaho sa SP Committee on Ethics and Public Accountability.
Apan sa magpangulo sa nasampit nga Komite, kasagaran kon may maimbestigahan nga mga mayor, ang komitiba dili na magdahum nga modaug pa sa sunod nga eleksyon kay mahimo silang ikampanya sa mayor o opisyal nga ilang imbestigahan.
Salbar ang SP Committee dinhi, mao nga malipay mi, dayag pa sa bise gobernador.
Kahinumduman nga gi-unod sa usa sa mga labing unang mandu sa gobernador sa iyang paglingkod sa pwesto ang katukoran sa OGAR sa Kapitolyo.
Ang OGAR, matud ni kanhi Cabinet Secretary Leoncio Evasco Jr, kinsa maoy pangulo sa buhatan, usa ka pagpamatuod nga seryoso ang Administrasyon ni Aumentado sa pagpatinuod sa gipanumpaan sa tanang gipili ug gitumbok nga mga opisyal sa kagamhanan: ang pagtuman sa mga tahas ug gimbuhaton sa giyak-an nga posisyon, ang pagtuman sa balaod sa Republika, sa personal nga desisyon ug sa walay pagmakuli.
Apan sa miaging nanglabay nga mga administrasyon, nilanog sa social media ug sa mga mantalaan sa Bohol ang pasangil sa mga iregularidad sa mga lihok ug nga transaksyones sa kagamhanan, butang nga buot sa Administrasyon karon nga paimbestigahan aron ilhon kon may angayan bang manubag.
Gipasabut usab ni kanhi Judge, Suceso Arcamo, usa ka sakop sa Board of Consultants sa OGAR nga sila mahimo nga usa ka bahan nga maoy magtimbang timbang sa unsay mogawas nga inisyal nga pagpanukiduki sa mga dokumento uban sa bahan sa mga abogado nga sakop sa OGAR.
Ug kay bahan, mahimo lamang ang mga desisyon sa simple nga majority, ug kon mahukman sa mga Board of Consultants nga may gibug-aton ang pasangil, angay nang maguol ang natungdang opisyal nga nalambigit sa iregularidad.
Walay personalan, pasalig ni Judge Arcamo, buot lang nato ang limpyo nga pangagamhanan.
BIGGEST ACCOMPLISHMENT
Mao kana ang mapasigarbuhong deklarasyon ni OGAR Chairman Jun Evasco atol sa paglusad sa OGAR sa iyang buhatan nga gitambongan sa Board of Consultants, Bise Gob. Balite, Gov. Aumentado, Provl Administrator Aster Caberte , G.O Chief of Staff Atty Jun Amora ug Exec Asst on Peace and Order Art Evangelista.
Dugang pa ni Evasco nga wala pay nakahimo niini sa uban pang mga lalawigan sanglit posibleng maigo mismo ang ubang mga kaalyado ug uban pa.
Sa dihang gihangyo siya ni Gob. Aumentado nga manguna alang sa pakig batok sa korapsyon ug mahimong advocate sa limpyong gobyerno, wala siya nibalidad saysay pa ni Evasco.
Lakip sa mga Board of Consultants sa OGAR mao sila kanhi mayor sa Tagbilaran, Manlalaban Dan Neri Lim, Retired Provincial Prosecutor Macario Delusa, retired Executive Judge Suceso Arcamo, retired Court of Appeals Justice Gabriel Ingles, Atty. Jordan Pizzaras ug Willy Ramasola.
Namahayag usab si Chairman Evasco nga dili magmahay ang mga katawhan nila.
Kahinumduman nga ang gipilde sa niageng piniliay ni Gob. Aris Aumentado nga si Atty Art Yap mao usab ang nipilde kang Evasco niadtong 2019 elections sa 2000 kapin nga boto lamang. (rahc/PIA-7/Bohol ug Kahlil Lester O. Camba)
