KON maghisgot ta’g politika, ana-a pa kahay makapildi ni Gov. Aris Aumentado pagka-gobernador karon nga ang SM supermalls nikumpirmar na nga magtukod sa ilang branch dinhi sa Bohol unang kwarter sunod tuig?
Mura’g wala na gayud basta walay binuang sa iyang liderato.
Mao kini ang ‘forecast’ sa mga analista sa politika ug bisan sa mga politiko nga nakasabot kon unsa na ka lig-on si Gob. Aris karong panahona.
Mao usab ang akong pangagpas. Kay ngano? Gituman man dayon sa anak nga Aumentado ang iyang saad nga mo-abante gayud ang Bohol kon siya modaug.
Ang nakanindot og samot, dili human sa usa ka tuig o usa ka termino natuman og anam-anam ang iyang mga saad, gani wala pa’y 100 days, grabe na ang iyang kalampusan.
Bisan wala ko kaabot sa ubang gobernador sa Bohol, makaingon ko nga si Gob. Aris Aumentado ang anaay ‘excellent performance’ nga amahan sa lalawigang Bol-anon.
Ngano? Gilaliman pud nga duha pa kabuwan kapin sa iyang lingkuranan grabe na ang nahimo.
Sa unang adlaw pa lang sa iyang paglingkod, gitukod na ang Office of Governance Accountability and Review (OGAR) pinaagi sa iyang Executive Order No. 02.
Diha makita sa katawhang Bol-anon kon unsa ka sensiro si Aris sa iyang saad nga limpyuhan ang Kapitolyo sa korapsyon ug unahon ang interes sa katawhan.
Una usab sa kasaysayan nga anaay gobernador sa Bohol nga nagtutok batok sa korapsyon sa niaging administrasyon.
Hinuon, dili man gud pud sama sa niaging administrasyon ang mga nangagi pa nga mga amahan sa Bohol kon ana-a na man gani silay gihimong dili maayo sa ilang pagdumala sa katawhang Bol-anon. Worst ang kang Yap.
Gihatagan gayud ni Aris ang katawhang Bol-anon og rason nganong siya saligan pa sa umaabot.
Mao na’y giingon sa mga millennials, “Wa na! Finished na!”
Pasabot, ana-a pa ba’y politikong may igong katakus aron moasdang ni Aris sa sunod Piniliay? Ambot lang.
Kay sa akong nakita karon, 1% ra ang chance nga modaug kon anaay mokontra niya, ilabina kon masugdan na ang pagtukod sa SM mall sa Dao, sa dakbayan sa Tagbilaran.
Una ng nikumpirmar ang taga-SM nga 100% committed sila nga motukod gayud sa ilang branch dinhi sayong bahin sa 2023, karon ana-a na usab laing makapa-wow nga gibutyag si Aumentado gahapon sa buntag: mosunod ang Robinson’s, Puregold ug Gaisano.
Dili na mabangbang si Aris sa maong dagko kaayong kalambuan sa Bohol, nga siguradong makahatag og daghang trabaho sa atong mga kaigsoonan.
Usa pa, dako kaayo kining tabang sa ekonomiya dinhi nga nahagsa og ayo ilabina panahon sa pandemya sa COVID-19 ug sa Bagyong Odette.
Kini ang dugay na kaayong gipaabot sa mga Bol-anon. Ug bilib kita sa baruganan ni Aris kay iya gayud gituman ang iyang mga saad.
Makaingon kita nga dako kaayo kining sagpa sa iyang mga kritiko nga ubos kaayo og tan-aw niya panahon sa kampanya ug Eleksyon.
Personal nga pagsaludo nako diha kanimo, Gob. Aris. Ug kahibawo ko nga mao usab sa hapit tunga sa milyong mga Bol-anon nga nibutang kanimo sa maong puwesto.
Mabuhi ka Gob. Aris ug unta giyahan pa ka og ayo sa Labaw’ng Makagaghahum. Abante, Bohol! Abante mga Bol-anon!
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
