NAGTUO si San Isidro Mayor, Atty. Diosdado “Dadz” Gementiza Jr. nga si Davao City Mayor Sara Duterte maoy common denominator sa mga presidentiables.
Kahinumduman nga bag-o lamang nagpahigayon sa caravan ang grupo ni kanhi senador Bongbong Marcos ug Sara Duterte samtang nagkakusog usab ang mga supporters sa alyansa ni Manila Mayor Isko Moreno ug Mayor Sara.
Dugang pa ni Mayor Gementiza nga dili na kapugngan ang kadaugan ni Mayor Sara pagka bise presidente ug presidential bets na lamang ang nagkumbati karon.
Dinhi sa Bohol, suportado ang BBM-Sara sa Team ABante samtang dunay mga grupo nga lahi ang gidala pagka presidente.
Sa Visayas, naglihok karon ang grupo sa (VISA) VIsayas for Isko and Sara. Dili pa lang dugay, 26 ka parallel groups sa Iloilo ang niyagyag sa ilang suporta ngadto sa Isko-Sara alliance.
Mao kini ang kampanya nga ilang gitawag nga #SwitchToIsko nga nikatay na sa Antique ug moabot pa sa Leyte ug dinhi sa Bohol. (Kahlil Lester O. Camba)
