“ANG pinakasakit nga kanser sa pagpangalagad mao ang pihig-pihig style nga pagpanerbisyo.”
Ana-a pa ba kahay konsensya ang maong mga lider nga muhimo sa maong lakang?
“Kun ana-a siguro’y mas init pa sa impiyerno, adto siguro na sila (mga kurakot nga pulitiko) isugnod (sa Ginoo),” matud pa sa akong kaila nga lider sa pulitika.
Kun ikaw lider sa katawhan ilabina inahan o amahan sa imong barangay, lungsod, distrito ug probinsya, makaya diay nimo nga ang uban nimong mga anak dili nimo hatagan og pagkaon o salapi kay sila nisupak kanimo?
Nisupak tungod kay wala kaangay sa imong mga gipangbuhat ngadto kanila ug sa ubang mga anak.
Siguro, alang sa ubang mga ginikanan sa katawhan, kaya kaayo. Kaya tungod kay puno sila sa kasilag ug kahigutgot ug dili sa gugma ug pag-amuma.
Sa pagbuto sa pandemya sa COVID-19, mas grabeng naila sa katawhan ang mga pulitiko nga nagpakaaron-ingnon nga lider sa katawhan.
Ug dinhi sa lalawigan sa Bohol, atong nasala kun kinsa ang tinuod nga mga lider ug kinsa ang kutob ra sa pagka-pulitiko.
“Ang ilang gihimo anaay duha ka epekto nila: makapaayo sa ilang mga dumadapig, ug makapadaot sa ilang imahe,” dugang pa sa akong kaila nga lider sa katawhan.
Sa akong pagsabot, yes, makapalipay ang maong mga pulitiko nga nanghatag sa mga hinabang ngadto sa ilang mga tawo ug wala sa dili nila mga kaalyado, apan wala siguro nila hunahuna-a nga daghan nga manghingampa kay wala hatagi.
Ang wala kadawat magdumot gayud kadto. Mudulot sa ilang kabukugan ang maong pagdumot.
Ngano? Kay dili lalim nga nag-atubang sa kalisod apan gipasagdan ra sa mga giilang ginikanan.
“Tig-a. Walay kasing-kasing. Buaya.” Mao kana ang mga termino nga mugawas sa mga ngabil sa mga anak nga gipasagdan sa ilang ginikanan.
“Ila pa karon. Apan muabot ang panahon nga musumbalik kanila ang ilang gibuhat. Lagmit, lakip pa sa maamong ang ilang mga anak,” suma sa usa ka ginang.
Sumala sa Bibliya, anaay salang panulundon. Kining maong sala, gikan sa sala sa unang tawo (ginikanan) nga sila si Adan ug Eba.
Ug kita nga ilang mga anak, sa pagkahimugso pa lang, ana-a na’y sala nga gibitbit.
Sa kaso sa mga pulitikong abusado, kurakot, tikasan ug uban pa’ng karakter sa ilang pagkatawo ilabina sa ilang pagka-lider kinatahay, ang ilang mga anak ug apo dili makalikay sa balos sa kahigayunan. Basin sila na usab ang mag-antos.
Panawagan sa atong mga kasamtangang lider ug umaabot nga mga lider, nga unta, serbisyuhi ang katawhan sa tinarong ug patas nga paagi.
Timan-i nga ang usa sa pinakamaayong legasiya nga ikabilin sa katawhan mao ang limpyong ngalan.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Mudawat lamang og seryoso ug dili binuang. Mag-amping kita, mga Bol-anon!
