SUPORTADO sa kapulisan ang balaodnon nga pagpahamtang og national curfew sa mga menor de edad gikan alas 10 sa gabii hangtud alas 5 sa buntag.
Si Police Colonel Uzmundo Salibo, hepe sa Bohol Police Prov’l. Office (BPPO) mapasalamaton sa pagpasayo sa oras sa curfew kay kini dako’g matabang para mogamay ang krimen kay wala may oportunidad ang mga kriminal nga makapangbiktima aning mga orasa ug para maprotektahan ang mga menor de edad.
Una niini, si Rep. Bernadette Herrera-Dy (Bagong Henerasyon Party-list) misang-at sa House Bill 1016 o ang “National Curfew Act”. Ang balaodnon nagtinguha nga did-an sa gawas sa panimalay ang mga menor de edad.
Dugang pa ni Salibo nga ang curfew proteksyon sa kabataan ug angay isipong pagpugong kanila sa ilahang mga kalihokan.
Matud pa ni Salibo nga mosugot ang kapulisan ug ilang gi rekomendar nga alas 10 sa gabii ang labing maayo nga oras para sa curfew.
TASK FORCE
Naglaraw si Atty. Butchie Zamnora II, konsehal sa siyudad sa Tagbilaran nga mag-umol og task force aron motabang sa pagpatuman sa lapad nga kampaniya sa curfew alang sa mga menor de edad.
Ang maong task force langkuban sa Department of Social Welfare and Services (DSWS), Department of Social Welfare and Development (DSWD), kapolisan, GAD, Department of Labor and Employment (DOLE), opisyales sa barangay ug uban pa nga mga grupo nga manginlabot sa maong kampaniya.
Matud ni Zamora nga aduna gyu’y mga menor nga magsuroy gihapon panahon sa lawom nga kagabhion hinungdan nga giawhag niya ang mga ginikanan nga mohatag og kooperasyon pinaagi sa pagpahimangno sa ilang anak kalabot sa curfew.
Gipasabot niini nga tumong sa maong lakang nga maprotektahan ang kabataan gikan sa mga daotang elemento.
Giawhag usab ni Zamora ang mga barangay nga mohimo og subsob nga pag-roving. Susihon usab niya ang ubang mga lagda kalabot sa curfew aron masuta ang mahimong madungag niini.
Samtang gipasabot sa konsehal nga nalakip ang DOLE sa task force gumikan kay gusto niya mahimoan usab og lakang ang report nga adunay mga menor nga nagtrabaho panahon sa kagabhion.
Ug klaro nga gidili kini hinungdan nga importante ang lapad nga pakisusi gumikan kay basin posibleng adunay matabang o mahatag nga solusyon ang maong ahensiya.
Hinuon iyaha pa nga ipresenta sa iyang mga kaubanan sa konseho ug sa executive department ang iyang tinguha alang dugang mga ideya. (RTB)
