DAGHAN ang nabalaka nga kon nidaug pa ang niaging administrasyon sa Bohol, mawa sa mapa ang lalawigan — mapa sa pagka-inila.
Matud pa sa katawhang Bol-anon ilabina sa mga netizens, daghang gibiyaang “hugaw” ang kanhi administrasyon nga ang bag-ong namunoan ang naghinlo.
Hinuon, kon buot hunahunaon, swerte si Gob. Aris Aumentado nga nagsunod siya og mga hugaw.
Ngano? Kay dinhi mapakita og ayo ni Aris kon unsay iyang ikabuga aron masilhig ang mga sagbot nga gikatag-katag sa mga wala nagtinarong sa ilang pag-alagad sa katawhang Bol-anon.
Sa akong personal nga pangagpas, mo-abante gayud ang Bohol — abante nga dili lang makita kondili masinati sa mga Bol-anon.
Si Gob. Aris sa akong personal nga kasinatian, sama sa sulti sa uban, medyo bugoy-bugoy ang nilihukan og inistoryahan — inato kaayo ang kinaiya ug tinagdan ba.
Ana-a ang bugoy-bugoy nga nilihukan pero maayong tawo.
Ug taliwala sa mga maot nga pagsaway gikan sa taga-pikas, siya gipaluyohan sa baga kaayong pundok sa katawhan.
Apan kining mga kaarang problema sa Bohol, kuwang ra gayud sa suporta sa ubang mga lider nga nakalingkod na sa niaging mga termino.
Ang akong punto, ana-a man ang kagustuhan nga matarong ang Bohol apan wala nilampos ang mga lakang sa mga tarong nga lider kay gibabagan kuno sa mga kaalyado sa niaging administrasyon.
Pananglitan, si kanhi Senior Board Member ug karon Bise-Gobernador Dionisio Victor Balite una ng ni-proposar sa Sangguniang Panlalawigan (SP) nga mohimo og imbestigasyon sa kaso ni “Ivan” apan wala kakuha sa suporta sa uban niyang kauban sa maong hawanan, tungod kay dili ka-partido.
Karon nga labaw na ang ilang numero sa SP, ana-a na pud nila ang kahigayonan nga ipabuhagay ang tanan nilang mga maayong plano alang sa Bohol.
Ug ang nakapabilib gayud ang kawsa alang sa limpyong pang-gobyerno ug unahon ang interes sa mga Bol-anon.
Sukad sa akong pagkabaton og buot, karon pa ko nakadungog og gobyerno sa Kapitolyo nga magpokus gayud sa pagpapha sa korapsyon sa probinsya. Siyempre, ang unahon ang mga Bol-anon nasunod gikan ni kanhi Presidente Carlos P. Garcia sa iyang “Filipino First Policy” nga karon maoy giprayoridad sa administrasyong Aumentado.
Nasugdan na man sa anak nga Aumentado, ang kinahanglan na lang ang bulhot nga suporta sa atong kaigsoonang kaayuhan ang gusto alang sa Bohol.
Ug sa kanunay, ayaw kahadlok kon ikaw nagbuhat sa maayo, sakto ug makatarunganon.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
