GIKLARO sa regional director sa Department of Education-7 Dr. Salustiano Jimenez nga walay diskriminasyon nga mahitabo sa pagbukas unya sa klase karong Agosto 22, 2022 diin bakunado o dili ang tinun-an dawaton gihapon.
Matud ni Jimenez nga mao kini ang gi-emphasize ni DepEd Secretary ug Vice President Sara Duterte ug tugotan nga makaadto sa mga tunghaan ang mga unvaccinated nga tinun-an.
Giawhag gihapon nila ang mga tinun-an, mga ginikanan ug mga magtutudlo nga wala pa nagpabakuna nga mag-counselling ug irekonsiderar ang pagpabakuna nga proteksiyon batok COVID-19.
Kadtong dili mga bakunado nga magtutudlo adunay anti-gen testing inabagan sa provincial government alang sa anti-gen test kits nga libreng ihatag sa mga magtutudlo ug non-teaching personnel nga dili bakunado.
Ang dili bakunado nga mga magtutudlo makahupot gihapon og advisory class apan sa dili pa sila magklase ipaubos una sila sa anti-gen test aron ang mga ginikanan dili mabalaka.
Nunot niini, nasayran nga adunay mga pipila ka tunghaan nga nagsugod sa ilahang Brigada Eskwela niadtong Agosto 1 samtang posibleng ugma Lunes sunod sa regional level ilusad nila Brigada Caravan isip pagpahibawo sa kalihukan ug sa tumong niini. (RTB)
