SUBLING nanawagan ang kongresista sa segondo distrito sa Bohol niadtong mga nalambigit sa ginadiling druga nga mohunong sa maong kalihokan.
Gibutyag ni Kongresista Vanessa Aumentado nga nasubo siya nga bisan sa hugot nga kampanya sa kapolisan batok sa ilegal nga drugas, apan daghan gihapon ang nalambigit niini.
Kini human suma pa ni Aumentado duna gihapon nga masikop ang kapolisan nga mga bag-ong personahe sa matag karon ug unya.
Nasayran sa magbabalaod nga daghan gihapon ang unang miampo sa Operation Tokhang, apan namalik sa ilang trabaho.
Gidugang pa ni CongW. Aumentado nga ang iyang buhatan sa kanunay andam nga mutabang sa mga ‘drug surrenderes’ nga gitawag karon nga persons who used drugs (PWUD) sa ingon nga dili na kini makabalik sa daan nilang bisyo.
Nasayran pa niini nga bisan pa man sa hugot nga kumpanya batok sa illigal nga druga daghan pa gihapon ang mga nangasikop ug mga nilambigit sa ilegal nga kalihokan sa syudad sa Tagbilaran ug mga kalungsuran sa Bohol.
Subay niini, gihagit ni Aumentado ang mga barangay official sa Bohol nga paninguhaon nga mapadayon ang ilang sertipikasyon isip drug cleared barangays kon sila mahatagan og kahigayonan nga maapil niini.
Niuyon siya sa sugyot sa Police Regional Office (PRO-7) nga magbutang og marker sa mga barangay hall aron nga mabutang sa hunahuna sa mga barangay officials ug sa mga residente nga kinahanglan ipabilin nga drug cleared ang ilang barangay.
Unang gibutyag sa PRO-7 nga adunay ubang mga opisyal sa barangay ang nagdumili na sa pagpa drug cleared tungod sa kahadlok nga mapasakaan og kasong administratiba kun dili kini mapadayon.
Nagkanayon si CongW. Aumentado nga kun dili man kini mapadayon nagpasabot nga aduna pa gihapon illigal nga drugas sa maong barangay ug kana maoy dapat nga paninguhaon sa mga opisyal. (RTB)
