ANG pagbaton sa kahilom kasagaran nga atong masinati sa mga relihiyosong kalihukan. Tuod man, daghang mga relihiyon ang nagbuhat niini. Ang mga Buddhist ug mga Hindu nagtudlo sa halawom nga pamalandong o meditasyon. Mismo ang tradisyon sa Simbahang Katolica Romana adunay gitawag og Spiritual Exercises ni St. Ignatius ug Lectio Divina. Kini mga pamaagi sa pagbaton sa pamalandong ug hilom nga pag-ampo.
Apan dili na kini sekreto. Mahimo na kining sukdon ni bisan kinsa pinaagi sa sayantipikong pamaagi. Unsaon? Sulayi kini pagbuhat. Kadtong mga nakasulay na niini makasulti gayud nga usa kini sa labing epektibong pamaagi pagpalambo sa katilingban.
Mahimo kini natong sugdan diha sa atong kabataan sa mga eskwelahan. Sulayi pag-implementar ang Moment of Silence kon Yugto sa Kahilum. Aron kini magmalampuson, kinahanglang buhaton kini sa pipila ka minutos inadlaw-adlaw.
Sunda kining mga gisugyot nga lakang:
Unang Lakang – ug labing mahinungdanon: Matag adlaw sa dili pa magsugod ang klase, ipahibalo sa tanan pinaagi sa usa ka loudspeaker sa tibuok tulunghaan ang Yugto sa Kahilum kon minute of silence.
Ikaduhang Lakang: Padad-ig sulat ang mga ginikanan ug pahibal-a sila nga inyong gisugdan kining maong programa. Ang ginikanan kinahanglang maghisgut uban ang ilang anak kon unsay mahinungdanon alang kanila ug mga bililhong baruganan o values nga gusto nilang hunahunaon sa ilang anak nianang mga gutloa.
Ikatulong Lakang: Paglabay sa usa ka semanang pagbuhat niini, ang mga bata agnihon pagsulat og saysay diin ilang ihulagway kon usay kahulugan sa yugto sa kahilum o moment of silence alang kanila.
Alang sa dugang pagtuon niining butanga, tan-awa kini nga pahina, www.momentofsilence.info. Tingale kung masulayan kini, adunay mahimong positibong kausaban sa atong katilingban pinaagi sa tagsa-tagsa ka bata!
Kon alang kanimo kinahanglan pa kining pamatud-an, sulayi kini: “Kung mag-ampo ka, sulod sa imong lawak, sirad-i ang pultahan ug pag-ampo ngadto sa Amahan, nga dili makita. Og ang Amahan, nga makakita sa bisan unsang dili makita, moganti kanimo (Mateo 6:6). Dayag na lang, kon imo kining sundon dili ka gayud magsinggit-singgit sulod sa imong lawak. Ang pagbaton sa kahilum diha sa pag-ampo kinahanglanon gayud. Sulayi kini. Pasulayi sa imong mga anak. Paglabay sa panahon, makugang ka sa resulta. Ayo-ayo.
