TINGUHAON sa lalawigan sa Bohol ang pagkab-ot sa tumong nga abton ang 90% nga vaccination rate sa mga senior citizens ug abton ang 50% nga vaccination coverage ug booster shot sa kinatibuk-ang populasyon sa lalawigan sa dili pa ang Oktubre 8.
Kini ang gitataw nga pamahayag ni Provincial Administrator Asteria Caberte, kinsa maoy nangulo sa tigum sa Bohol Inter Agency Task Force on the management of Emerging Infectious Diseases sama sa COVID Hunyo 7.
Kahinumduman nga walay langan, gipatawag dayun ni Gobernador Erico Aristotle Aumentado ang BIATF sa usa ka emergency nga tigum, tungod sa taho nga namatikdan ang pagsaka ka usab sa kaso sa COVID dinhi.
Gitaho ni Neil John Oclarit, nurse sa Provincial Health Office nga niadtong alas 10 sa gabii sa Hulyo 6, miabut na sa 30 ka atibong kaso sa COVID ang natala sa Bohol.
Pito ka semana ang milabay, wala na unta’y kaso nga natala sa Bohol, apan sa katapusang duh aka semana, makit-an sa graph nga mingsulbong gikan sa 21 ka kaso ngadto na sa 27 ka kaso sa imaging semana, saysay ni Oclarit.
Sa inadlaw nga pagtutok sa mga kaso, gipakita sa BIATF nga niadtong Hunyo 26, duha pa lamang ka kaso, apan sa pag-abut sa Hunyo 30, milobo ngadto sa 20 ang kaso ug nagpadayon na ang iyang pagsaka.
Sa 30 ka kaso nga natala, matud sa Gov Celestino Gallares Hemorial Hospital Chief, Dr. Mutya Macuno, 6 ka pasyente ang nakaconfine sa tambalanan, ug sa iyang pakisusi, kining tanan, wala mabakunahi.
Dala niini, gipadayag usab ni Ochoco nga may mandu na ang bag-ong presidente nga sa unang 100 ka adlaw sa iyang termino, kinahanglang makaabut na sa 90% ang pamakuna sa tanan nga senior citizens sa tanang lalawigan ug makaabut na sa 50% sa kinatibuk-ang populasyon sa nasud ang makakuha na sa unang booster shots.
Kasamtangan nga ang Bohol anaa pa sa 62% sa pamakuna sa mga senior citizens ug 12% pa sa paghatag sa booster doses sa kinatibuk-ang populasyon niini.
Dala sa sitwasyon, gimandu usab ni Caberte ngadto sa mga sakop nga clusters sa BIATF sa paghimo og mga plano aron mapatuman na dayun ang gipaaskil nga pamakuna, human sa Hulyo 14.
Gisugyot ni Dr Macuno nga tutokan sa Bohol ang espesyal nga pamakuna sa mga kalungsuran nga ubos kaayo ang vaccination accomplishment, magpadala og mga espesyal nga mobile vaccination teams didto sa mga volunteers ug magbutang usab sa mga fixed vaccination centers aron maoy tuoron sa katawhan nga buot magpabakuna.
Agi og sinugdan, magpahimutang usab ang Bohol og fixed vaccination site sa Sandugo Festival Ground sa old Airport sa Tagbilaran, gawas pa man sa inadlaw nga mga pamakuna sa fixed sites sa mga malls niining syudad.
Matud ni Interim Sandugo Festival coordinator nga si Ana Loinda Salu-an, buksan ang vaccination site sugod alas 8:00 sa buntag ngadto sa alas 4:00 sa hapon, matag adlaw.
Dugang pa, sagopon na usab sa Bohol ang estrikto nga pagsita sa mga tawo nga mosulod sa Sandugo Festival Grounds kon may bakuna ba sila, aron malikayan ang pagtakod didto.
Ang Sandugo Festival Grounds, usa ka bukas ug hawan nga venue, apan bisan pa, mandu sa Capitolyo, ibalik dinhi ang pagtan-aw sa vaccination card ug face masks, sa tanan nga mosulod sa Festival Grounds ug mosinati sa mga kalingawan didto. (rahc/PIA-7/Bohol)
